mr Lefrançois

à chaque coup que j arviens à bruay , j' peux pas m' impecher d' penser à li à chaque co que j' ravisse ech' trottoir in face del mason d' em mère
i habito dins l' rue leverrier et vraimint gamin, i m ' faijot peur
quand que j' le voyo passer such' trottoir in face, j' me camucho pour l'observer, curieux et apeuré tout in meme timps
i perdo ses caveux, avec sin front dégarni, eune moustache épaisse , et un r'gard qui t' lincho que t oso pas l' raviser in face , i parto d' ché li pour aller faire ché courses avec deux grands cabas, mais i s arreto vite, tout essoufflé, et j' cro qu' sin r'gard noir qui nous porto ach' momint là chéto pour garder s' fierté , j avo peur qui m attrape , mais al' reflexion i auro bin été incapape ed courrir
l' mine ale l avo usé, j' a su qui avo un taux d' silicosse dans les 70% à s' deminder dins quel état i devo et' ché gins qui étotent cor plus pris de chte maladie
c' qui m écoeuro ché qu à chaque coup qui s arréto , i raclo s' gorche bruyammint, comme si i auro voulu artirer d un coup toute el ' merte accumulée dins ses poumons ou ch' qui in resto aprés toute eune vie ed mineur
vous dire quel ache i pouvo avoir , al' reflexion ptete 70 ans et encore j a des doutes, ptete plus jeune
j a jamais osé li parler, si j' avo al' croiser such' trottoir del rue anatole france, de loin j' me metto à courrir, comme cha j avo pas à li parler , à li dire bonjour
j avo toudis peur in passant qui m'attrape min bras, pour mi chéto comme un ogre
i a décédé bin vite, s' femme elle , ale a cor vécu eune paire d années
j a su bin aprés in in r'parlant avec quéqu un des' famile qui éto in fait très gentil
ché pour réparer un peu min comportemint d' gamin que j tiens à li rente hommache