ch' pélican

min père i s' surnommo ch' pélican, savez l osio qui va querre del nourriture à ses infants et qui l' ardonne insuite a's ' progéniture

i nous faijo sin numéro à chaque coup, d ' abord , m' mère ale avo pas interet d' jetter del nourriture al' poubelle , a li d' mindo sin accord, et pour qui disse ouais, fallo vraimint que cha so au bord des viers, ou alors suret, sinan et encore suret ché pas vrai

j' cro bin que ché un reste, ché l' cas del dire, ché un reste de c' qui avo vécu quand qui éto infant
j' sais que l' périote qui a été l' plus dur pour li cha a été quand sin père i a décédé et qui s a artrouvé seul avec s' mère dins des conditions financières difficiles et qui éto pas prévu d' jeter , cha auro été un sacriléche

mais eune paire d années aprés, j a connu l' meme réaction ché les tantes d' min père, quand qu in faijo à minger , in in faijo pour un régimint, t in mingeo l' midi, l' soir chéto sur, l' lend'main soir sur aussi, et là vraimint ins' poso des questions si inl' proposait pas l' trosieme jour, et j exagère rin
ptete aussi que cha li a resté d' l occupation , et plus sur'mint cor aprés la libération, j' me souviens qui dijo qui zavottent in fait plus souffert del faim et del pénurie, durant la périote de reconstruction 1945 1946 que pendant l' guerre mondiale
alors tous les soirs, et souvint l' midi i yavo un tchiot bol des restes del' vele, souvint fro in vinaigrette mais aussi récauffé et i faijo un point d honneur à faire signaler que chéto toudis li qui finisso ché restes, qui s' sacrifio et que chéto li ch' pélican, qui s' sacrifio pour ses infants, à minger tout c' qu in voulo pu

et que dire des fromaches, parel, si y avo un bout qui traino dinch' frigo, il le mingeo tout in dijant qu in ouvro tous ché fromaches et qu in finisso rin, et qu in pouvo pas laicher cha comme cha et que li is' sacrifio

l' nourriture chéto sacré, jamais , jamais in a jué avec du pain, meme achteure j' peux pas comprinte et j' peux pas admette ed vire des gins faire des boulettes avec du pain et les lancer aprés , ché au d' sus d' mes forches, j' buqu'ro dins ché gins , j in ai un sentimint d' dégout rin qu ale dire
mais j' dos avouer que j' m a surpris plus d un coup, al' mason à juer aussi au pélican