Je vous salue l' Abbé
par leon grossel le, 29/01/2007
Je vous salue l’ Abbé
Saint Pierre , fais attintion , quand t’ouvriras cheulle porte ,
I étot pus fort solite et putôt « mal à pattes » ,
Faudrot pon l’ bousculer , i a fort saquer sur l’ corte ,
Alors , ches derniers temps sin cœur il étot mate.
Va falloir qui s’arposse , l’ temps d’ arprinte haleine ,
Et au bout d’un momint , quand i s’ra rapuré ,
Té vas l’ vire s’ léver et i va printe la peine,
D’ aller r’mercier ch’ Bon Diu , d’ l’avoir enfin rappelé.
J’ voudros pas Saint Pierre ,vous donner un consel ,
J’ supposse qu’ au Paradis , o z’êtes bien équipés ,
Qu’o z’avez Internet , suremint l’ ADSL ,
Que vous lijez l’ jurnal , et ravisez l’ télé .
Mais muchez vite tout cha ! , surtout ne l’ laichez pas ,
Acouter les discours , raviser tout l’ dallache
Que s’ mort a provoqué , in partant d’ichi bas ,
Pasque j’ in sus certain , cha va l’ armette in rache .
Je l’ vos d’ichi l’ abbé , escouant sin bâton ,
Qui pourrot bien aquaire sur l’ nez d’un politique ,
In criant : « taijez-vous ! I a donc vraimint rien d’ bon ,
Qui sortira un jour d’ toute cheulle maudite clique ! .
Vla ti pas qu’in pinse même à m’drécher d’z’ estatues ,
A m’donner des médales, à dire « ch’ tot un Saint homme »
A appeler « Abbé Pierre », ches lois et ches avenues ,
A dire « ch’est bête , s’plache , ch’étot suremint à Rome ».
Vous n’avez rien compris , i a pas d’quoi ête fort fier ,
Vous dijez « et à s’ t’heure, quoi qu’in va faire sans li ? »
J’ vous l’dis eune fos pour toutes : « vous êtes tous l’ abbé Pierre »,
Je n’ fais pas d’ différence intre vous et pis mi !.
J’auros jamais cru cha d’ête à ch’ point là bouché ,
Ti possipe d’ête si bête, i n’ont donc rien compris,
Cha fait 53 ans qu’ je m’ tue à l’répêter :
« Quand té donnes à quéqu’un ch’t’à ti qu’ té fais plaisi !! ».
Pour avoir kaire ches gins , faut pas faire d’ chichi ,
Cha n’est pas tout d’ les vire , i faut les raviser ,
Même si ch’est difficile , faut avoir à l’esprit
Que t’auras rien donné , si t’as pas tout donné. !
Et alors là Saint Pierre , i va r’mette s’capeline ,
In marmonnant dins s’barpe , i va vous déclarer :
« J’espère qu’ichi ches paufes i font pas du campine ,
Qu’ les riches et les moins riches sont tertous mélangés .
J’espère qu’ au Paradis, i a pas d’ première classe .
Je n’veux pas qu’ in m’installe à côté de ch’ Bon Diu,
Donnez-me eune kaielle , et faijez-me eune plache
Ichi , derrière l’ porte , juste à côté de ch’fu.
J’va accueillir ches gins , vire c’mint qui s’ont traités ,
I a n’in suremint dins l’ lot , certains que j’ connaichos.
L’ frodure alle s’installe , l’ jour qu’in va m’interrer.
I a suremint des paufes diapes qui sont mort dins ch’rucheau .
J’espère qu’ichi au moins , té t’ fais pas arfouler ,
Qu’in d’minte pas tes papiers ,ou des fiches d’salaires .
Que té seuches blanc ou noir , ou bin café au lait ,
J’espère Seigneur qu’ ichi , o n’avez pon d’ Karcher . »
Bertrand COCQ