el capiau d'paille d' marraine Jeanne
par dubois monique le, 07/04/2007Marraine Jeanne , ch'étot l'bonne d'ech curé d'Enquin les Mines. In l'avot tous ben quère et un jour, pou li faire plaiji , min père décide ed l'am'ner vir la mer à Merlimont
in quitte l'cité Maroc et in va récupérer Marraine à ch'presbytère: all' sort ed'là tout indiminchée, all' frétillot à l'idée d'passer eune' journée au bord dell'iau ! all ténot un biau capiau d'solel in paille qui avot un' belle fleur pou l'décorer; in aurot dit qu'all' ténot l'ptit Jésus dins ses mains tellemint qu'all' y faisot attintion : fière comm Artaban qu'all' étot , l' marraine!
In a dell chance, y fait biau timps à Merlimont, pour eune fos , y a point d'pleuve ! ; marraine all veut mette sin capiau mais y a trop vint et i s'invole toudis , all' a biau essayer , all y arrive point... alors all' continue d'el tenir comm'eune relique ....
in s'promène tous sur l'sable et pis in s'perd tous ed vue , à in momint in s'aperchot qu'in treuve pus marraine Jeanne ; in crie, in cache , plus in cache moins in l'vot ! dù qu'chest qu'all' est bin passée ?
Et pis tout d'un coup , in intind : "j'vos sin capiau !"... in queurt tartous , in vot ch'capiau... et in d'ssous ... l'marraine qu'étot quéue dins eune bache ... comme all étot tiote , in voyot que s'tiête et sin capiau....
In l'a vit' arpéchée, all' étot toute frèque et in a ben ri in voyant ess' fleur qui in avot pris un sacré coup dins les niflettes ! marraine aussi d'ailleurs ! et all' disot intre deux rires : " et j'auros pu m'noyer "
All' l'avot bin étrenné sin biau capiau !
All' va vers ché 100 ans et all' in parle incore !
j' vas vous l'ardire, avec Monique in né s'connaichot pas trop, in a queques années d'écart qui font qu'in juot pas insempe , mais in étot voisines dins l'cité Maroc à Grenay , Monique habitot l'coron derrière l'mien
pi mi j'a quitté Grenay et j'sus partie à Enquin les Mines et vlà ti pas qu'in s'aperchot avec Monique que l'bonne du curé d'Enquin chétot s'marraine
alors pinsez si j'a bien connu aussi l'marraine Jeanne ...
avec eune copine in allot l'vire au presbytère tous les samedis pour récuperer des tiots magazines qu'in distribuot dins nou coin, in a bin rigolé avec mad'moiselle Rombeau , in passot toudis un bon momint, in étos jones et in s'amusot d'un rien et Jeanne ale rigolot toudis avec nous et quequefos aussi monsieur l'curé d'ailleurs
j'voulos raconter eune anecdote à Monique qui nous amusot toudis
l'Abbé Delval y étot très gentil, y avot un problème y avot pas d'mémoire, i nous r'demindos toudis parel et cha nous amusot
mais ch'est à l'messe que chétot quequ'fos plus drôle, et ouais i oubliot quequ'fos qu'y avot eune quête à faire ...
et alors là in ravisot tous , d'jà bien amusés in connaichot l'suite ..., vers mademoiselle Jeanne passequ'in savot que cha l' contrariot un tiot peu et ch'étot toudis l' même scénario
all'essayot d' l'interpeler comme all'pouvot, sans crier fort bin sur, in faisant des sines, enfin all' essayot d'attirer s' n'attention comme all'pouvot, all' ravisot chés infants d' choeur, et ch'curé i finissot par s'aperchuvoir qu'y avot comme un problème, i ravisot Jeanne qui continuot à essayer d'li faire comprinde à mots bas et par sines qu'i oubliot quetcosse, i finissot par comprinde, i ravisot chés infants d'choeur qui sur un orde commun attrapotent vite fait chés paniers et s'linchotent dins l'allée pour faire el quête