eune tornade à Equihen

Nous v'la à Equihen em' mère , em' tiot soeur et mi , not' pére y'avot du rintrer à l'maison , j'sais pu pourquoi
in campot au pied dech' monumint Bazin , su les hauteurs d'Equihen , l'bonheur , quoi !
Et pis , un soir , l'vint i a comminché à s'lever et à souffler de plus in plus fort , in n'avot jamais vu un si grind vint et l'pleuv' al s'in est mêlée, eune tornade , eune vraie tornade
in étot muchées dins l'canadienne , et in n'étot pas rassurées
cha claquot d'tous les côtés : l'toile ed tente, el' tonnerre , el' bruit del' mer ....
à in momint i a fallu qu'in s'mette à tenir les piquets d'tente em' mère devant , mi derrière et em' tiote soeur , al faisot c'qu'al pouvot ! in avot même pas l'temps d'braire tellemint qu'in avot peur
et pis , y faisot noir, mais quand y'avot un éclair , ch'étot incore pire !!!

Finalemint , el' toile al a pas résisté, al s'est arrachée et in s'est retrouvées in pyjama sous l'pluie battante aussi réhues qu'des glaines noyées......
y'avot d'tout autour d'nous : l'vache à iau , l'réchaud , les couets , des loques , el matelas d'paille tout raplapla , des bouts d'fichelles ... l'apocalypse , quoi !

in étot pas les seuls din ch'cas là .. Mais à coté d'not plache y'avot des gins dins un' caravane (les premières qu'in voyot , à ch'l'époque !), et chés gins là i nous regardotent par leu hublot sans v'nir à not' aide...
l'municipalité al nous a évacués dins l'nuit à l'salle des fêtes .. et plus tard in a eu l'plaisi d'vir nos caravaniers évacués aussi à cause d'un grind coup d'vint qui avot rinversé leu caravane !

Ch'est comme cha ! finies chés vacances , plus d'canadienne , plus d'matériel... quand not' pére est v'nu nous quer , y'avot plus gramint d'bricoles à mettre dins l'remorque !