min pépère Pouchain(5), ech'l'auto
par dubois monique le, 27/04/2007El' vie d'min pépère asse confond aveuc el vie d'ech'l'époque et j'sus sûre que ben des gens i s'arverront quind j'raconte mes tiotes histoires...
Min pére i avot pas d'auto (pas gramint d'gins i n'avotent), d'abord i avot pas sin permis d'conduire et pis après, es paie d'ouvrier du jour al suffisot pas !
Min pépère, li, i avot des sous : ches mineurs silicosés z'avotent eun' bielle retraite, rappelez-vous ! et i avot invie d'eune auto ... pas pou li, i étot trop viux pou apprinde à conduire, pas pou aller in vacances, i aimot pas trop cha, i voulot aller su l'tombe ed'ses deux frères tués à l'guerre 14-18 : i y avot jamais été !
I a donc conclu un pacte avec min père : "tiot, j'tacate eun' auto d'occasion et ti, t'em' conduit su l'tombe ed mes frères".
Fallot d'abord qu'min père i euche sin permis, et cha, ch'a faisot pas tout seul ! min pépère i trépignot : cha allot pas assez vite à s'mode !
Pindint ch'timps là i z'avotent acaté eun grosse 403 noire d'occase .... et ch'étot cor pu terribe ed vir ch'l'auto là, et qu'in pouvot toudis pas l'prinde ! pépère Pouchain , i s'impatientot et i faut vire commint !
Enfin ! l'vlà , ch'fameux permis, mais faut cor attinde qu'min père i euche des congés et qu'i l'prenne in main, ch'te 403....
Pou faire plaisi à min pépère, i li faisot faire des tiots tours d'auto comme al' ducasse : min père i allot l'quer apres s'n'ouvrache et i s'promenotent dins ches corons !
Chaque fos qu'min pépère i voyot eun' connaissance, i faisot arrêter min père et i li disot : "ch't'in comarade, i est viux", ou bien "i est silicosé ", ou bien "ch'tin brav' homme", ou bien "i pleut, i va ete tout freque"!...
bref, el 403 al' servot d'taxi et tout compte fait, cha déplaisot pas non plus à min père! i apprenot al l'conduire !
Em' mère all' ralot ben un tiot peu : s'n'homme i étot parti pou pas longtimps ... i revenot queques heures après, all' le croyot à Grenay et i étot à Lens pou conduire ch'pauv' voisin polonais d'pépère, qui devot aller vir sin fieu à chl'hopital, et j'in passe
Quequ'fos i z'étotent nombreux ed'dins et quind i in avot un qui devot déchinde, i fallot qui passe pa' d'zeur leu gambes et ch'étot pas simpe, vu qu'chétot tous des viux....
Et pis , un jour , in a été prêts à partir : ch'a a été l'espédition in direction ed Maurepas
min pépère i étot tout contint, i frétillot, min père i allot pas assez vite "t'es traîne, min fieu"... mi, j'i étos aussi avec em' tiote soeur, em' mère et em' grind-mère : in étot 6
ches deux hommes à l'avint et nous z'autes derrière ....
Pépère Pouchain, i avot l'art ed dire à ch'conducteur : "arrête teu tiot, j'sus prêt d'picher, arrête teu vite ! mout meu in indrot ..."... in plein' ville, ou là où i avot des gins !
In est arrivé à Maurepas, et i a trové ell' tombe ed' sin frère et faut vir comm i a brait, mais i étot contint in même timps, et nous in étot tout armués et contints pou li aussi.
El trajet d'retour i a été pu calme : i étot mate et i avot eu ch'qui attindot d'pu si longtimps, mais in a cor eu droit à dz' arrêts pipi urgints !
Aprés Maurepas, in est tous partis à Verdun, dins ches mêmes conditions, et là i nous a fallu pas mal ed d'timps pou r'trouver ell' tombe ed s'in aute frère
in a visité ch'l'ossuaire, i a lu ches noms su ches steles et i in arconnaissot... in a eu du mal à l'déssaquer d'là! "ech'ti là, i étot d' Bruay, ech'ti là ..." i n'in finissot pu ... et i racontot d'z'anecdotes qu'in n'avot jamais intindu !
L'403 all' avot bien jué sin rôle et rindu min pépère Pouchain heureux, et nous famille auchi !