el' machine à laver d'em mère

Min père, i avot été blessé al' fosse et i avot eu 3 dogts d'el main droite arrachés, alors in l'avot r'monté au jour et i avot appris l'métier d'tourneur - outilleur - rectifieur et i avot passé tous ches CAP
i travaillot aux ateliers centraux d' Bully les Mines et i avot querre à faire des bricoles.

Un jour, in 'a eu marre ed vir em' mère faire es' lessive in brossant sin linge ave eune brosse ed' chiendent su eune planque, i a eu donc invie d'i faire eune machine à laver
sitôt dit, sitôt fait, i s'documinte, et i acate des corniéres in alu, des toles et i fabrique eune machine avec l' moteur d'eune mobylette et eune courroie
ne m'demindez pon commint al marchot : j'm'in souviens pu ; y faut dire qu'j'étos tiote in ch'timps là, j'devos avoir 6 ou 7 ans! min père i s'arquinquot : i étot pas peu fier de s'machine: les femmes d'elz alintours al z'inviotent em' mère !.

Mais j'em souviens ben qu'em mère al étot pas à invier! al risquot ch'piau, tous les lundis, chaque fos qu'ale lavot sin linche ! al se faisot toudis "électriser" quind al devot mette ches mains dins l'machine : al'poussot un tiot cri et al trimblot...
al le dijot à min père et li , quind i essayot, i s'passot jamais rien, alors i y dijot qu'ch'étot dins s'tiete que cha s'passot, que l'machine al étot arliée à l'tierre et qu'i avot pas à avoir peur !
Cha devot auchi s'passer dins m'tiete pasqu'eun' fos, j'ai mis em' main dins l'cuve et mi auchi, j'em sus fait électriser...
Et in plus, al arrachot l'linge , i s'coinchot dins l'système et m'maman al s'fatiguot à décrinquer ches mouchoirs ou ben ches draps ! et j'vos parle pon du bruit qu'al faisot ! in aurot dit qu'al allot décoller, j'mattindos toudis à l'vir s'involer !

Em' mère al disot rien mais al boycottot l'machine à laver quind al le pouvot...
et al continuot in s'muchant à brosser sin linge su l'planque, mais fallot qu'al so sèche avant l'retour d'sin mari !

Et pis un biau jour, al a grillé (l'machine, pon m'mère) al fumot, al avot fait sauter ches plombs, ça sintot l'roussi tout partout dins l'mason ... Youpie !

Queques mos après, min père i avot pas insisté pou l'réparer (sutout quind min grind père paternel i y avot dit qu'cha aurot pu éte es' moitié qu'aurot pu griller) et m'mère al a acaté eune belle machine à Bully à ch'magasin Pette !
CroÏez-me, l'invention d'min père, al aurot pas pu rimporter un prix ach concours Lépine !