min Pépère Pouchain (6) i aimot pas qu'in laiche seu

Min pépère , i voulot pas quitter sin coin, i étot contint qu'in parte in vacanches, mais i aimot pas nous vir partir ! allez vir !
Tous z'ans, in quittot l'cité Maroc - j'l'ai d'jà dit - et à not artour, in s'demandot quelle bêtisse i avot pu faire!

Eun' fos, i avot acaté à un arprésentant qui étot passé dins l'cité d'ches pinsionnés, 100 boutelles ed vin... z'avez ben lu : 100, pas 10 !... "j'l'ai goûté : i est cor meïeux qu'du vin douche !"
Sauf qu'chés pas des boutelles qu'in li a livré : ches des tonniaux !
Et in a dû s'y mettre tartous : in a fait l'collecte ed boutelles dins l'voisinache, in les a nettiées, fait séquir, in les a rimplies et j'em' rappelle qu'in a eu bien des misères pou infoncer ches bouchons d'liège aveuc ein apparel qu'in avot du acater espres : in n'l'avot jamais fait et chés deux hommes i savotent pas s'y prinde au début, al cinquantième : cha allot mieux ...... In réalité , in n'a pas eu 100 car y avot d'el perte !
y avot d'z'étiquettes avec ches tonniaux, mais in n'a pas pris l'peine d'zé coller!
Et j'vou pale pas d'l'odeur ed vinasse ! heureusemint qu'in s'étot mis dins l'baraque à carbon !

Et pis après, mes gins, min pépère, i a réalisé qu'i avot pon d'cave pou ringer ches boutelles ed " vin douche " ..... in n'a mis dins ch'l'armoire, à nou mason, dins nou cave, in n'a donné queques eunes à ches voisins (z'étotent contints).
Finalemint, ch'vin i a pas conservé, ch'est dev'nu d'el piquette tout juste bonne à fair du vinaigue !

In aut' fos, in rintrant d'Merlimont, ch'étot des draps et des pièches ed'tissu qui nos attendotent!!
des draps écrus, raides comm'el justice, et du tissu d'mécante qualité...
In a jamais pu ebouer ches draps tellemint i z'étotent lourds, i z'ont point servi mais min pépère i z'a gardés au cas où.... et maman, alle a copé des patalons dins ches pièches ed d'tissu : i s'chiffonnotent toudis, et min grind-père i avot l'air d'un loqueteux quind i les mettot: et i s'intêtot à les porter ! in avot honte nou z'autes del vir attiffé comme cha !

A ch't'époque là, in pouvot pas s'rétracter dins ches 7 jours ! et in payot in liquide ; et min pépère ch'étot pas eun infant pou l'i donner eun' tatouille !.. min père i croyot qu'chés colporteurs i devotent attinde qu'in parte pou aller buquer al' porte ed min grind-père et l'arnaquer.

J'pourros cor vos in raconter d'aut' mais ch'a vou lasserot.

I l'a pu fait quind sin voisin d'porte, un viux mineur polonais, i s'est fait tabasser et voler s'pinsion par des gins qui v'notent vinde d'z'articles in été
ch'est min pépère Pouchain qui l'a intindu geindre comme un cahou et qui l'a secouru ; cha l'a arfroidi et i a pu fait intrer des gins qu'i connaissot pon

I avot eu l'timps d'in faire des bêtisses avant cha, passqu'i étot pas contint qu'in n'seuche pas là i s'conduisot comme eun infant !