min pépère Pouchain (7): em' carnasse !

J'vos racontos , l'aute jour , qu'j'étos allée à "Suzanne Blin" in 6ème ..... Cha m'a fait pinser à min vélo et pi à l'carnasse qu'i étot fichelée su ch'porte-bagaches ! et forchémint à min pépère !
Quind i a su qu'ech partos ach' cours complémentaire , min pépère Pouchain , fier com' Artaban , i a déchidé qui fallot marquer l'cop ! I a bien souqué et i a treuvé : "j'vas acater eune belle carnasse al tiote pou li faire es' rintrée dins ches grindes études !"

Cha n'a pas traîné : un biau matin ed septembe in est partis à deux, min pépére et mi, pou aller querre el bus amon CAES... ch'étot eune spédition : Pinsez donc, mes gins, in allot tou seu à Lens faire d'z'emplettes !
Mine ed' rien, i s'étot rinseigné avant et i savot du qu'ch'est qui fallot aller pou treuver d'bonnes carnasses: y avot un maroquinier dins l'rue del' gare.
In est intrés dins l'boutique et min grind-père i a dit à un jonne vindeux : "em' tiot fille al va faire ed' grindes études, j'veux i acater eune carnasse qui dure longtimps : moute me, ch'que t'as d'pu solite"
I li a moutré des carnasses fantaisies, al mode de ch'timps là : min pépère i les soulevot, les tatot, les sintot, i ravisot ches fermoirs
mi, j'avos ren à dire : quind j'ouvros m'bouque, i m'disot qui allot m' mette ches plus solites ed côté et que j'pourros choisir intre ches modèles là ! pas d'z'autes !
Dins min souvenir, in est restés eune paire d'heures ... cha dot pas ête vrai, mais cha m'a simblé ête un long jus !

Et pis, j'ai eu l'drot d'choisir : eune belle carnasse in cuir rouche foncé aveuc deux compartimints et eune poche à l'avant: al étot belle, al sintot bon ch'cuir
min pépre i a apprové min choix et i a pas voulu el mette dins in sac : i l'a fait imballer dins in biau papier cadeau.

In est rintré par ch'l'autobus et in est déchindu amon Glasson, pou quanger!
Cha a été l'fête al mason et j'intinds incor min pépére dire : "em fille, si qu't'in prinds soin, al durera longtimps".

I croyot pas si ben dire !

Em ' carnasse al m'a suivie pindint toute em ' scolarité... et quind j'sus passée d'l'aute côté d'ech bureau, dins m'classe, al étot toudis là !!
Intre timps, min pépére i l'avot ben bichonnée: i l'nettoyot, l'cirot, arcousot ches fils, rimplachot l'poignée, eune attache .....
al étot cor là quind min pépère i est mort....

Al tenot pu drot, fallot l'poser conte ech'mur ou ch'bureau, sinon al s'affaissot et al répindot ch'qui avot ed'dins
in 1995, ch'étot pu possipe ed min servir : in pouvot pu mette ed'pieche in cuir, l'matiére al s'effritot, comme si ch'étot du papier
alors, j'l'ai eu gros su l'coeur, mais i m'a fallu in acater eune nouvelle , qui n'avot rien à voir aveuc ch'ti d'min pépère
mais l'aute al avot battu l'record ed' longévité: 38 ans : "t'es verra m'tiote, al va durer longtimps"....

J'me disos aussi d'puis l'30 in a pas eu un' histoire d'min pépère Pouchain , cha comminchot à m'manquer , j'me suis incore régalé al lire , gramin d'souvenirs nous arviennent in mémoire et j'dis qu'une chose ce n'est que l'début, alors bonne plume.