eune plante décoratiffe !
par dubois monique le, 11/05/2007I a eune paire d'années d'cha , j'avos inmené d'z'élèves vire eun écomusée à Pisançon (cha s'treuve dins les Alpes). In a été rechu par un jonne étudiant qui nos a moutré l'dedins d'eune viele mason du coin : i faisot frod et cha sintot l'musi; ches tiots i n'avotent qu'eune hâte : aller vire c'qui s'passot dins l'z'alintours pou s'dégourdir leu gambes .
L'jonne i a vite compris qui fallot leu faire pliji passeque i n'écoutotent pu rien et i touchotent à tout... i leur a dit d'eune vo qui s'voulot déchidée : " pou nous récaufer, in va sortir et aller vire eun biau gardin botanique ".
In arsort del' mason et i nous moute queques plantes ed montagne qu'in vot gramin dins ches coins d' bos....
Au biau mitan d'ech massif, ches élèves i sont intrigués par eune belle plante aveuc des grindes feuilles vertes et d'grindes fleurs blanques , al étot larche , al prénot del plache, i z'ont d'mandé c'que chétot et j'intinds core chti jonne qui leu dijot :"ch'teune plante décoratiffe, j'connos pas sin nom !"
Mi, j'rios dins min coin ... ch'étot eun grind pied ed rhubarpe !
A Grenay, in avot del rhubarbe dins tous chés gardins pou i faire del confiture, des tartes , jamais in n'les laissot grindir jusqu'à c'qu'elles euchent des fleurs !...
J'in ris core !
Et ben , mes gins, ch'ta ch'momint là , in parlant aveuc mes collègues, qu'j'ai réalisé qu' gramin d'Haut-Alpins, i connaissotent pas l' rhubarpe ! quind iz'in rincontrotent, pou eusses, ch'étot eune plante ornemintale aveuc d'jolies fleurs blanques, persistantes, et qui prénot del plache dins leu gardins ! al éloignot chés sales herpes !
Mais mi, j'avos arméné del rhubarpe ed Grenay dins min gardin, al avot bien profité : faut dire qu'em n'homme i est natif ed S' Omer et qu i connot ben l'terre, i met c'qui faut comme fumier à ches pieds, i z'a plinté à l'ombe et i les bichonne aveuc amour !
Quind mes batons iz'ont été rouches et gros, j'ai fait queques tartes al' rhubarpe et j'les ai apportées à mes tiots : ch'étot pou eusses l' première fos qu'i z'in mingeotent : i n'n'a qui ont eu querre , d'autes pas ... mais iz'ont tous mingé "del'belle plante décoratiffe !"
j'auros pas pinsé que l' rhubarpe ch'étot pas connu partout in France, du coup j' mets el photo del mienne au cas où y aurot des visiteurs qui n'saurotent pas c'que ch'est, cha peut arriver, j sus désolée mais y a pas fleurs non plus à l'mienne ... comme Monique j prinds soin d les artirer ...
mi j'a eu bien du ma à faire démarrer un pied d'rhuparpe, j'a fait l'tour de ch'gardin avec des nouviaux pieds régulièremint, cha prénot pas , pis un coup après avoir fait l'tour de ch'gardin, j'sus passée d'vant et j'l'a mis à coté del porte d'intrée et ch'est parti ! , ch'est ptete pas l'plache idéale mais achteure que j'sais que cha peut ete vu comme eune plante décoratiffe , ben j'sus rassurée .....
En veyant l' photo d' Marie Claire, je dis qu' ch'est superbe à voir cette plante, bin sur cha prind d'el plache, nous in n'avot mis au bout d'ch gardin et al n'a pas pris, du coup on réaissera l'prochain' fo.
J' vous dis bon appétit et bon dimanche à tertous.
( 1 photos)