y'a rien qui ch'perdot dins chés corons
par dubois monique le, 15/05/2007Dins l'mitan dech XXème siéque , in vivot simplemint , in manquot ed' rien, mais in perdot rien , in j'ejtot pas gramin et chés poubelles al' débordotent pon comme achteur.
El pain séqui, i servot à chés lapins ou à chés humains : pain perdu , ou ch'pain d'chien traditionnel!
Ch'lait tourné , i servot à fabriquer eun bon fromache blanc mason : em' maman al versot ch'lait dins eun torchon d'vaisselle ben prope , al le nouot et al le pindot dins ch'gardin su l'fil à linche, quind i restot que d'l'épais, in l'mingeot chucré ou salé.
Tout ch'qui poussot dins ch'gardin i étot trinsformé in confitures , in conserffes pou l'hiver (bettraffes rouches, cornichons , tiots pos ..... et d'autes!
in récoltot chés pontières , ches ognons , ch'l'ail ...
In faijot séquir del' minthe verte , del sauche ...
In faijot d'bons pâtés aveuc ches lapins ......
Et j'in oublie cor! mais vous z'autes vous pouvez arviffe tout cha!
In vivot tous parel à ch't'époque là ! et ch'sus sûre qu'vos vos arconnaissez tous , dins l'façon d'faire aveuc c'qu'in avot , sins l'gaspillache quind connot achteur....
Eune fos , ch'parlos d'cha aveuc em pus jonne fille (al a eune vingtaine d'années) et al m'a répondu : "t'es cros pas qu't'exagéres : at'n'époque, et même du temps d'mémé Lou, ch'étot pon l'Moyen-Ache !"
Du cop , j'ai pon osé l'i parler d'ech que j'vas vous écrire achteur :
al m'aurot prise pou eune sorcière !
Et voichi, mes gins , et ch'est pas eun' mintérie : i avot eune voisine qui v'not quer du brin d'coulon tout frais, tout caud .... pou faire des cataplasses qu'al posot su s'tiete quind al avot du mau... i paraît qu'cha l'i réussissot !
faut croire , passequ'al n'a pris gramin dins l'pigeonnier d'min père ! al grimpot pa ch'l'équelle aveuc eune tiote pelle et eun bol , al choisissot ches plus biaux étrons et al s'dépêchot d'rintrer ach mason pou s'soigner !
Ch'étot pas quer ... et ch'étot naturel ! i faudrot l'breveter !