visitez l'fosse d'Arenberg !

Mes gins, j’sus point un incien carbonnier mais m’père i’a ouvré eine milette à l’fosse à Marcinelle alors j’ai ker (j’aime) tout chu qui ramintuve (rappelle) el Mine.
L’sémaine dernière, aveuc des comarates qui vénote ed Gap, m’feimme et mi, in est dallé visiter chu qui resse dé l’fosse d’Arinberg. In a été archu comme des ros pa eine équipe des carbonniers artraités, des bénévoles bin simpatiques qui ouévent aveuc amour à sogner leus z’inciens bâtimints et à faire el guite.

I z’avottent gramint du plaisi à parler à chés gapençais. Oscar K.(s’nom finit comme autobus), i nous a pourméné dins l’site. In preume, in est dallé vir l’décor du film Germinal, si bin fait qu’in busiot qu’in s’treuvot din eine bowette ! Et après in est dallé vir el salle des pindus, l’déquinte à l’fosse, l’gare ed triache (ej l’appelle ainsi) duss qu’les berlines décarquotent el carbon et arpartotent.
In a ravisé chés espositions ed photos et pis chés barettes et pis et pis plein d’affaires sins oblier l’éléphant dé l’liberté !

Oscar, i s’amusot à vir not’ seurprisse et admiration. Sapré brigand i m’a ermeudé (demandé) d’soul’ver eine « pleume ». Mamère comme ch’est lourd ! Et pis in a voulu monter à l’toupette (sommet) du quéval’mint (j’pale comme un borgeos) mais i’avot treup d’breume, in s’a arrété à mi quémin.
Alors ej voudros armercier cor un cop Oscar, ch’passionné, pou tous l’z’esplications su l’métier d’carbonnier, un rute métier, un métier d’homme sins oblier d’armercier ses comarates.

I paraitrot qué l’site d’Arinberg i va servir à faire du cinéma. In c’minche à arnouv’ler (retaper) les bâtimints. Dommage qu’i’a des agosiles (vauriens) d’jonnes qui s’musent à bruler les décors in bos et ruent (jettent) des cayos su les ferniètes pou brisier les carriaux. Mais in va mette du grillache padvant. L’principal est d’warder l’fosse in bon état.

Mes gins, allez vir Arinberg et si vous y allez , dites bin l’bonjour à Oscar ! Tiot Rital