sauret

1er couplet

Dins l’temps passé nou bonn’s vieil’s gins
Mingeot’nt tout simp’ et s’régalotent.
Sans mette ed napp’, coutiaux d’argint,
Les pains d’tros lifes i défilotent ;
Beurre et fromach su l’quignon d’pain,
Inn bell’ gouss’d’al, inn échalote
Et tout l’famil’ mingeot à s’faim
Mais d’quoi les gins i’s pourléquotent ?
au 1er refrain

2ème couplet

Dins ches corons, in fin d’quinzaine
I manquot d’sous dins ch’porte-monnaie,
Ch’étot toudis el minme ringaine :
« Quoi qu’in pourrot faire à minger ? »
L’fenme a n’arrétot pas d’busier.
Adon ch’mineur tout in riant
I disot : “point l’peine ed cacher,
in va minger friand-battant !”
au 1er refrain

3ème couplet

Inn fos la vie dév’nue moins dure,
i z’ont pu faire meilleure cuisine.
In peut dire sans leu faire injure
Qu’i n’ont pu manqué d’vitamine.
Cha n’impèche pas qu’ed timps in timps,
Histoire ed calmer leus invies,
I trouvot’nt fort appétichant
Avec un goût d’revenez-y
au 1er refrain


1er refrain

Inn pétote à l’iau
Cuite avec du sé
On z’allons souper
Avec un sauret
El laite ch’est pour ti !
Et ch’croc ch’est pour mi
In va s’régaler,
Avec un sauret



4ème couplet

El temps i passe et n’s’arrète point,
In devient vite des pinsionnés.
In bot un verre ou deux d’bon vin,
Quand l’occasion nous est donnée :
In va quiqu’fos au restaurant,
Avec inn paire ed bons amis,
Mais in s’souvient ed nou jonn’temps
Quand in mingeot d’bon appétit
au 2ème refrain


2ème refrain

D’inn pétote à l’iau
Cuite avec du sé,
qu’in s’a régalé
Avec un sauret.
El laite ch’tot pour ti !
El l’croc ch’tot pour mi !
In s’a régalé
Avec un sauret

Adéodat Larivière
Lièvin (62)