l'moqueux d'gins et l'pichon
par Maxandré le, 13/07/2007EUL’ MOQUEU’ D’GINS ET L’PICHON
Inn’ d’a qui cach’ les moqueux d’gins
Et d’aut’ qu’i’ont tchire d’les éviter
Mais l’Seigneur les a inventé
Pour que les sots n’seuchent pos malin
De leur bêtiss’. Et ch’est fin bin !
J’vas raconter dins cheulle histoire
Commint Batisse i’a eu à boire…
Dins eun’ soirée i’est invité.
Ch’étot chez in célèb’ banquier
Qui’étot r’nommé dins tout l’canton :
Dins s’pok il al’vot des urchons.
I’avot su’l’taff’ tout plein d’pichons
Et dins l’assite à nou Batisse
I’avot sur’mint l’pu maigrichon
Des habitants des grands abyss’
Qu’in peut treuver pos lon d’ichi
Du côté du canal d’Roubaix.
« Cha ch’est in plat pour in artisse :
A l’déguster j’vas m’pourléker.
Mais bin avant de l’dépechi
J’vas li d’minder si min amisse
Qui s’a noyi l’été derni
Il a acore in compte in Suisse. »
I prind l’bestiau par l’incolure
Aveuc eun’ pinche à épiler
Et i’acoute tout près de s’fidjure
C’que l’pichon I-a à raconter…
Vlà qu’cha intrigue eul’ financier
Et d’vint sin air eun’ d’avoir deux
I dit à s’n’hôte pour l’rassurer
« Chin qui m’a dit ??? Ch’est malheureux,
Car si in d’vot interviouver
In de s’famille qui-est moins langreux,
N’d’arot gramint à révéler
Et l’bénéfice s’rot contagieux.
In sarot dù qu’i’a des péniches
Qu’i’ont fait naufrache et dù qu’des riches
Ont tout perdu, argint et or ! »
Eul’ financier intéressé
Li d’minde d’in raconter acore!
« Si j’dos toudis continuer
Eum’ n’inquête su les naufragés
Donnez- mi pour les questionner
Plus de témoins … et qui seuch’ frais! »
Et comme aveuc la ginte marine
Eul’ lanque s’comporte comm’ eun’ saline
I dit : « J’voudros sins le k’minder
Du vin pour mi m’ désaltérer. »
Et ch’est c’soir là qu’in a appris
Qu’in épinoque au pont Nyckès
Avot blotchi l’hiver derni
In bateau rimpli de vin d’messe…
.
Ch’est ti pos trisse que cheulle histoire
Ch’est trinsformée dins les esprits ?
Qu’alle a contribué à la gloire
D’eun’ sardine d’in port du midi ?
Et ch’est resté dins les mémoires
Alors qu’cha a eu lieu ichi !!!