Les qu’vaux, d’min timps

Si un jour y vous prind l’invie d’parler d’bidets,
Dins l’sémaine, el diminche, avec n’inporte qui,
Vous intindrez : gagnant, plaché, o bin tiercé,
Jocquey, photo, att’lé, y a d’quo êt’ abruti.

Pourtint y a point longtimps, quind in parlot d’quévaux,
In s’in parlot surtout pou eune question d’ouvrer,
J’arbusie à ch’timps là , comme ej’ les ravisot,
Dins les rues, d’ins les camps, sins jamais arnoncher.

J’ai core dins m’tiète leu noms, j’m’in rappell’rais toudis,
Bayard, Bijou, Sultan, Coquette o bin lisette,
J’in connaichos même un qu’in nommot Paradis,
Ch’n’étot point compliqué pou r’connaite chés braves bêtes.

Ch’étot plaisi d’les vire obeir à leu mait’.
J’vos core ch’ti du méd’cin saquint s’cabriolet,
L’quévau du marchind d’loques avec tout ses cloquettes,
Et les bidets d’brasseux, à leu carette att’lés.

Mais ch’qué j’avos l’pus quer’, ch’tot les qu’vaux des cinsiers,
J’pouvos quind j’étos tiot les suire pindint des heures,
Les raviser ouvrer, tout seu o bin couplé,
Dins l’zéteules, à bett’raffe, ou ocore dins l’labeur.

Parfos quind y pleuvot, in s’mettot à l’abri,
Tout cont’ leur corps feumint in inttindint qu’cha s’passe,
Les bêtes y n’bougeottent point, et n’faijottent pas un pli,
Et mi j’étos heureux, comme si ch’étot l’ducasse.

Eune aute cosse qui m’plaijot, ch’est quind el forgeron
Cangeot un fer usé au pied des qu’vaux bridés,
Taillint comme un artisse leu gros chabots tout ronds,
Et dins min nez j’sins core l’odeur del corne brûlée.

Jé l’z’ai connus au fond courageux, malheureux,
Saquint l’long des bowettes leu train d’balles ed carbon,
Long des camps, du solel, y mourottent à tiot feu,
R’grettint sur’mint les jours oû y étottent à l’moisson.

A ch' t’heure y sont bin rares les qu’vaux du timps passé,
Ch’est des engins affreux qui les rimplachent partout,
Mais l’homme s’apercev’ra, li qui est toudis pressé,
Qué l’bon timps y s’in va, mais li qui dévient fou.

Paul Sébille , Relais Magazine Mensuel de la Région minière du Nord Pas De Calais
MAI 1982 N° 145