el carbon d'em grand mère

Comme min grind père i avot ouvré dins les bureaux del compagnie des mines d'Anzin, eme mémére, même veuve touchot du charbon. Sin soupiral i étot juste à l'arrêt du tramvay, j'vous dis pas à quelle vitesse fallot l'rintrer.
El marchand vidot ses sacs dévant l'soupiral. Jé n'me souviens pas du nom del pelle, i m' sempe que ch'étot un louchet, par compte jé m' souviens du nom des différents carbons: y avot des boulets, des gaillettes, des grémions et bin sur du poussier

Dins l'cité Maroc à Grenay, y'avot pas d'tramway mais y avot des rucheaux sur l'bord d'chés trottoirs et dins chés ruisseaux .... y avot souvint del pleuve !
Quand ch'carrieux d'carbon i v'not baller sin tas d'vant l'maison (ch'étot pas des sacs), el' carbon , j'devros dire el poussière qu'in donnot à chés ouvriers du jour , i s'mélingeot à l'iau et ch'étot tout eune affaire pou l'rintrer dins l' baraque à carbon , dins l'fond delle cour, in y allot aveuc des siaux qui dégoulinotent et qui étotent lourds, in laichot des traces noires su l'trottoir qu'nou maman al brossot tous chés samedis. Quand i avot des gaillettes potables , in les triot et in les mettot dins l'brouette , i fallot les ringer à part , passeque allumer ch'fux aveuc du poussier ch'étot pas eune mince affaire !
Chés imployés i z'avotent du bon carbon in sac et du tiot bos... ch'étot pas l'cas pou nous z'autes et je m'rappelle el' mal qu'em' mère al avot pou allumer l'cuisinière avant qu'in veuche el'ballot funquer ! quéquefos , ch'étot toute el cuisine qui étot infumée ! i fallot ouvrir chés portes tellemint qu'in étot infinqués ; cha piquot aux yux, cha sintot mauvais, tout cha passequ'el carbon qu'in nous livrot y étot pas d'bonne qualité!