L' Bégueux

Réponse à Momont : Les cabinets dans la cour

Chés masons d'carbonniers et d'overriers avottent el basse campe (W.C) à l'cour et menme à l'débout du gardin . Cha n'étot point aisile (aisé) quaind in étot pressé. V'là chi eine histoire qui moute chu qui peut arriver. EL BEGUEUX

El sam'di soir, à l'mon (maison), m'pére et ses comarates ,
s'rassanot'(se rassemblaient) autour d'eine pinte pou juer à cartes.
Min pére avot comme part'naire Milio l'bégueux,
pasqué ch'tot un fameux jueux !

Mais, ch’ soir là, rin mais rin n' dallot !
Misére ! Les 2 compéres étot' toudis capots !
D'pu un bon momint Milio i perdot pied !
I s'torténot, sofflant comme un bué ! (bœuf)

L'pauffe i'avot un mau d'panche carabiné,
i li fallot daller habile au cabinet !
Mais à chaque cop, qui s’lévot,
i'avot toudis quéquin qui l'rasseyot !

" Rassis 'teu ! V'là chi d'bonnes cartes ! "
Bref, i s'arténot tell'mint qu'i in étot malate !
Mais l'douleur alle d'vient si forte,
qu'Milio rue sin ju et coeurre à l'porte !

Les 2 mains su s'panche inflammée,
arténant s’marronne déboutonnée ,
bertielles au vint i coeurt comme un dératé,
a l'débout du gardin, duss qu'i avot el cabinet !

Quèque temps aprés, su l’suel (seuil) Milio,
d’mande : " J’voudros un ra-ra-mon ,un sé-sé-ïau ! "
Min pére li donne chu qui d'mande,
et mine d’arrien i l’suit à l basse campe ! (W.C)

Là, i frotte ses yux ! Espectaque d'infier !
L'sauce longtemps arténue sous pression,
éclatant din eine terripe esplosion ,
s'étot espitée (éclaboussée) partout et par tierre !

Arténant d'rire, m'pére dit à s'n'ami confus :
« Vrémint faut qué d’mes propes yux, j'leuche vu ,
Pasqué jamais ouais jamais ej n'auros cru ,
qu'les bégueux bégottent aussi du c.... !

Tiot Rital

Bonsoir à tertous, ravissante l' tiote histoire, vous savez mes gins cha arriffe plus vite qu'in n' pinse et mi j'appelle cha l'courante et in i fait du crépi après l'explosion. Adé à tous et bonne fin d'soirée.