l' rentrée

cha sinto l' roussi d' puis un tchiot momint, in éto rintré d' vagances et m' mère ale avo sorti ch' cartape pour vérifier eune derniere fo si tout i freumo bin , si ché coutures ale zétotent pretes pour arfaire eune année avec un brizaque comme mi ......
cha sinto l' roussi aussi, vu qu au matin i faijo plus fro qu au mois d aout, in voyo pas cor ché zours polaires dins les rues d' bruay , nan là fallo attinte mi novempe, par conte pour avec del guile au bout du nasiau, y a des coups djà début octope , ch' temps i éto bin fro ......
l' rintrée , ah djà qui fallo réviser eune semaine avant d ' rintrer a l école , ah djà qu in devo aller s' couquer plus tot pour bin s arposer avant l' reprisse, bin que cha n avo rin a vire avec l' dernier diminche au soir, du qui fallo vraimint aller s' couquer tot , "eh d' main ché l école" comme si j' le savo pas, faut dire aussi qu' min frère, i s' géno pas aussi par mi me l' rappeler et pour et' sur que j oublie pas i m' le rappelo toute l' derniere semaine .........
pi chéto l'grand jour, oh m' mère ale m avo bin acaté eune nouvelle paire ed godasses, et am' présinto cha comme un sacré cadio, oh té va et' bio a l école avec cha ...comme si cha m' toucho...... mi j' auro préféré rester juer à merlimont sul' plache à juer dans les baches , mais nan in pouvo pas rester au mois d septempe vu que tout l' monte i quitto merlimont et que là ouais té pouvo vire des zours polaires sul' plache début octope, ah rigolez pas mes gins , zavez djà été à merlimont rin que sur l esplanate d'vant la mer, un diminche d octope normal, cha veut dire pluie ou pire qu' cha l' vint, ouais mi j a des souv'nirs d' prom'nate d'vant la mer, que l' vint i éto tel'mint fort que t avo des bourrasques ed sape qui v'notent s' claquer sur tes mollets d' coq ........
té va vire té va artrouver des copains, oh parints , faut pas accroire , in éto pas viu , mais in savo quand meme c'qui allo nous arriver toute eune année ..... lecons, exercices, artrouver ch' pétit liffe bled, du qu in allo devoir faire tous les d'voirs in long in larche in travers

nan, in éto pas contint d artourner a l école...... mais al' reflexion , in a pas tous eune pensée particuyere quand meme such' te périote là....à méditer

Salut tertous,
Ch'est sur que l'école nous aura tous marqués. Période d'insouciance et de tiots malheurs qui nous font sourire achteur.
Tout tiot chétot l'rintrée avec ch'tablier et l'frod à mes guimpes, parcque m'mère al'avot pas toudis des sous pour m'acater des pantalons.
Sur l'kémin, yavot l'coup d'eul al'porte ed'labattoir, chés pourchios qu'in ménot à coups d'fourche et chés vaques qu'in tuot à coup d'masse sur leu tiète. Cha cha m'avot marqué.

In avo aussi toudis d'l'encre au coin de l'ongle du majeur. Au cours de l'année, y'avot l'instituteur qui nous attindot al'porte del'classe avec el poubelle parcqu'y savot qu'in étot passé par l'gardin d'un voisin et qu'in avot maraudé des groselles (dont les grosses vertes qu'in appelot des tonneaux), alors i nous f'sot vider nos poques.
Y'avot les coups d'règles sur ché dogts et les piquets.

In' da qu'on parlait des odeurs qui raminnent des souvenirs, mi ch'est celle deul cire qui fait r'pinser à celle qu'in ram'not à l'école pour cirer not'tabe à la fin de l'année scolaire.
Pu tard cha été le lever pu tot pour prindre ech'bus pour aller au lycée. Ah! Arriver in s'conde et vire chés files ed terminale qui nous simblotent des finmes à ch't'époque.
Les "flingues" pour aller au bistrot jouer au baby (avec el lamelle glissée au dessus del tirette pour pas payer). Faut pas qu'min fieu y vo cha, sinon em'nautorité al va in printe un cop.
In n'dorot plein à dire sur c't'époque.
Bon diminche mes gins.