El dintier
par TIOT RITAL le, 01/10/2007EL DINTIER
L’aut jour, au cleub " Natation pou tertouss" , ej’ vo Monique em’ belle soeur qui argane el rive in soumaquant. "Qu'es t'a Monique ? " Alle répond:" Aipiédumindintyé ! - Quo ? - Aipiédumindintyé ! - Articule vinguette !! - Aipiédumindintyé ! " qu’alle crie in moutrant s’bouque grand overte
Ej vos eine bouque sins dints ! J’comprinds : alle avot pierdu sin dintier ! Alors’, j’ai plonqué au fond dé l’piscine : Point d’dintier ! Comme i'étot cor bin coté à l'Argus i'a p'têt quéqu'in qui l'avot wardé ! Monique a du minger du liquide: soupe, purée, tiot potins pou bébés .Es' n'homme i passot tout à l'moulinette ! Même les moules frites ! I mettot tout din eine castrole et zou un cop d'moulinette ! Ch'tot l'prémier cop qu'Monique alle mingeot des moules frites .... aveuc eine palle !
Alors es'n'homme i'caché ein dintier d'occasion ! D'abord au Mont d'Piété ! Mais à l'débout d'huit jours i'a fallu rinte el dintier au propriétaire arvénu l'arkerre ! Pi s'n'homme i n'd'a treuvé un à l'brocante ! Mais Monique parlot eine miette saccadé pasqué ch'tot el dintier d'un d'un bé bé bé gueux !
Point d'avanche, i falot un dintier professionnel! Mais s'dintisse i'étot dallé in Amérique pou apprinte ed nuéves technologies. Es'n'adjoint, un jonne, i'a fait un dintier provisoire aveuc eine résine à base d'ossiaux d'caméléon ! L'dintier dév'not viert quand Germaine mingeot d'z'épinards, rouche quand ch'tot des tomates, noir quand ch'tot du café , tricolore quand ch'tot l'14 juillet et ed toutes les coleurs el soir du fu d'artifiche !
Mais des cops el dintier i s'bloquot ! Es n'homme, bon bricoleux, i'a mis un arsort .Un jour Monique est dallé vir el Mayeur pou louer eine mason del commune ; l'arsort i'est arsorti pa l'tro dé s'nez ! El mayeur i busiot qu'Germaine alle tot eine extra terreste quand Germaine répétot comme E.T : Mason ! Mason !
Héreus'mint el' dintisse titulaire i'est arvénu ! I li a fait ein dintier numérique programmape ! Programmation des coleurs des dints à cheulles des loques ! Programmation ed 3 vitesses d'masticache : vitesse accélérée : appétit d'affamé ! Vitesse normale aveuc passache ed lanque pou les guinses (régal) ! Tiote vitesse : ch'est point bon ! Aveuc arrét complet à 2 positions: Bouque grante ouverte pou s'faire opérer des amydales, bouque freumée si on veut juer au muet !
Pusse un dispositif pa télécommante pou artreuver un dintier pierdu: soit in déclanche eine sonnerie et in peut coeusir el son : Pinpon d'Pompiers, carillon d'églisse , musique ou cor simpe parole ! Soit el télécommande déclanche signal clignotant ! Trés pratique in cas d'panne ed clignotant dé s'carette ! Soit el télécommante alle fait avancher el dintier jusqu'à vot' plache ! Ch'est chu qu'a pris Monique ! Mais un jour es' tiot jonne i l'a imprinté. Non point pou l'utiliser ! Pou faire eine courses d'ingins téléguidés ! Et i'a gangné l'course !
In pusse el dintisse i li a mis un pianotache interactif ed liméro pas les dints ! Autermint dit ch'est un dintier/ téléfone portape ! Mais l'facture ed téléfone ed Monique a tell'mint été salée qué s'n'homme i’a confisqué l'dintier !
D'pu ç'temps là Monique alle répète toudis : " Aipiédumindintyé ! Aipiédumindintyé ! "
Tiot Rital