Les jardinsché mineurs marocains
par roger le, 30/06/2005A coté de m'maison i avot quatre barraquemints.
Y avot des familles de mineurs d'din, et quand De Gaulle y a fait appel à ché marocains, pour venir travailler din chez fosses, car in manquo d' main d'oeuvre française, chétot din chez années 60, i sont donnés des maisons à chez familles d'mineurs et i sont réquisitionnés chez barraquemints pour ché marocains. Ils les ont bien aménagés, cuisinières, des lits, tables, tabourets etc...
Ch'barraquemint i étot coupé in deux, y avot 6 bonhommes de chaque côté, et chaque moitié i avot 3 chambres de deux lits, et eun' grande cuisine.
Quand mes gins i ont arrivés, bin in avot un tiot peu peur quand même, i étotes habillés avec des grands mantiaux avec eun' cagoule su leur tiète, in a su aprés qu'cha s'applot eun' djellabah, enfin i se sont installés din leur barraquemint, et comminché à travailler à l'fosse 2 bis à Hénin Liétard. Fallo les vire partir à vélo l'un derrière l'aut', i savotes pas gramint rouler à vélo, si ch'premier i frénot trop brusque, bin i étotes tous à tierre, in a bien rigolé, mais nous in étot jone, in savot nin du qu'ché qui v'notes.
Chétot des gins calmes et propres, tous chez sam'di ch'baraquemint i étot nétié à l'grande eau, i faisotes leur lessive à l'main, et quand i faisotes à minger, qu'est ce que cha sintot bon, d'abord min premier couscous chez là que j'lai mingé, et du pareil j'nin ming'rai pu.
In a même jué un match d'football avec eux, j'vous dis pas, nous avec nos basquets in toile, et eux avec leurs godasses et d'fosse, des bleus in a eu à nos gambes, chétot vraimint des gins sympas, qui ont bien aidé à arlevé la France.
