ed' l'ail dins m'cauchette !

Quind in étot un tiot peu inrhumées , nou maman al imployot l'manière forte pou qu'in gueriche vite fait: el soir, al faisot cauffer eune brique réfractaire dins l'four del cuisinière à carbon et m'tiote soeur et mi, in montot s'coucher; dins chés chambres du haut , i avot pas d'fux et l'hiver i faijot frod: i avot des biaux dessins d'givre su tous chés carreaux...ch'est tout dire ! in s'serrot pou s'récauffer!

Première étape : nou maman, al grimpot chés escaliers avec es' brique caude inveloppée dins un journal et al mettot tout cha dins not'lit, al passot partout ; ch'étot l'bouillote d'chés mineurs.. et in appréciot l'caleur d'chés draps.

Deuxième étape : al ardéchindot et al arvenot aveuc un plateau bien garni : i avot deux bols ed lait bouillant aveuc eune tiote goutte ed rhum Négrita qui parfumot ch'l'escalier à mesure qu'al argrimpot... et pis, ch'est pas tout : y avot auchi deux cauchettes in laine rimplies d'ail épluché...
nou maman al attachot l'cauchette autour ed nos cous, bien serrée, aveuc eune épingue ed' nourrice, et in buvot note bon médicamint...
et après un gros bisou, al fermot l'lumière et in s'nichot dins nou lit tout caud! Bien souvint ch'a suffisot
mais i nous arrivot d'aller à l'école parfumées à l'ail, tell'mint l'odeur al étot tenace, al restot dins nou caveux !
queque fos, l'odeur ed d'l'essence algérienne al dissipot chelle ed l'ail : ch'étot plus agréape!

Achteur, j'ai laissé quer l'ail, j'mets un cache-col et j'bos min bol ed lait au rhum quind j'em sins patraque, et j'pinse toudis à m'mère et à s'n'ail!

Din not mason in f'sot cha ossi ! I'avot 2 rasons : In preume, min père i mingeot tell'mint d'ail pou sogner s'hypertincion qué m'mère alle avot trové ch'moïen là pou mucher s'provision d'ail. In deusse, ch'tot, in été , pou nous proutéger, pindint l'soir et l'nuit, des bleusses mouques à bren qui donotent el frousse à m'mère et seurtout d'chés moustiques ! Pasqué comme in dormot pon loin d'eine rivière, i'avot plein d'moustiques; el matin in in artreuvot des chintaines estoqués (tués) pa l'sintimint (odeur) ed l'ail.