Symboles et Légindes ed Noé 2

L’ Crèche :
L’évingile (II, 7) d’St Luc dit qu’Marie n’avot point treuvé d’plache dins l’auberche, édon alle est dallée dins eine étabe et a couqué Jésus dins eine mingeoire pou bétal, du latin cripia, dév’nu crèche in frinçais. Fot savoir qu’à Béthléem, dins les collines, i’avot des grottes et des hôtels aménageote leu étable dins chés grottes. D’ailleu, au III sièque les chrétiens d’Bethléem vénérote eine grotte qui arot abrité l’sainte Famile. Achteur, i’a cor des crèches in carton marron bin froissé arprésintant l’grotte. Par extinsion, l’créche a désigné l’indrot dé l’naissance d’Jésus. L’pu incienne arprésintation dé l’Nativité date ed l’an 380. Ch’tot eine pinture murale d’eine tombe treuvée dins les combes ed Saint Sébastien à Rome. In n’d’a treuvé eine aute, aussi vielle, à l’Basilique ed Saint Maximin (Provence).

In dit qu’St François d’Assisse, volot arrap’ler aux gins el mystère dé l’Nativité. Dins l’nuit du 24 au 25 déchimbre 1223, à Greccio (Italie) i’arot plaché, dins eine grotte, des gins du villache arprésintant Joseph, Marie, Jésus dins s’mingeoire, des bergeolins aveuc leus agniaus, el baudet et l’bué. L’baudet pasqu’i avot trinsporté Marie. A l’naissance d’un infant, in d’vot payer eine taxe aux culs à laine (fonctionnaires) du Recins’mint. N’ayant pon d’doupes, Joseph i ‘avot imm’né un bué.
Pu tard, à Prague, in 1562, des Jésuites i mettent dins eine églisse des estatues in tierre cuite, qui arprésintent Marie, Joseph et l’tiot Jésus. Porquo in tierre cuite ? Pasqu’in dit qu’Diu i’a créé l’homme aveuc dé l’pourette (poussière). Pis i z’ajout’ront des bergeolins (les preumes avertis dé l’naissince) , leus agniaus, l’baudet, l’bué, les Ros mages qu’in plache el 6 jinvier. L’crèche alle d’vient el mode dins les églisses d’Italie pis in Europe. In Italie, in f’ra les crèches d’luxe dites « napolitaines »: estatues peintes qu’in appel’ra pastori (bergers), les pus tiots ed 10 à 15 cm , aveuc belles loques. Cha dur’ra dusqu’a 1850.
Comme i’a du commerche inter Naples et Marselle, l’mode alle atterrit in Provence.
Au 18 ième sièque, vient el mode des crèches « Provencales » . Alles sont faites aveuc des tiotes estatuettes appellés santons (du provençal santoun = tiot saint). In in fait aveuc dé l’mie d’pain dé l’cire, du bos . Pu tard, in mettra des santons arprésintant tous les métiers pis aussi des masons.
L’étoile à l’toupette dé l’crèche arprésinte l’étoile qui a conduit les Ros Mages à Béthléem. In est pon seur dé l’date exacte dé l’naissince ed Jésus. aisin inviron 7 ans avant l’naissince officielle ed Jésus, eine super Nova, eine étoile géante, arot fini d’vive et arluisot gramint. In sait pon grand cose des ros Mages qui s’rote des savants et qui arprésintent l’humanité (un homme blanc, un gaune ,un noir). L’évingile dit qu’i v’note d’l’Orient, p’têt’ qué ch’tot d’l’Egypte. Melchior, l’homme blanc, a apporté d’l’or symbole dé l’Royauté, Balthazar, el noir, ed l’encens symbole dé l’divinité, et Gaspar l’asiatique, dé l’myrrhe (résine odorante qui servot à imbaumer les morts) symbole dé l’rédimption rédimptrice ed l’homme.
Ch’est seurtout les catholiques qui font des crèches ; cha n’ecziste point chez les protestants. In principe, in met l’crèche el preume Dimanche ed l’Avent, (4 sémaines avant Noël) et in l’arsaque el 2 Février , Fiète dé l’Cand’leur , jour dus qu’in a présenté Jésus au temple.
Crèches à vir :
Rimini (Italie ) , créche ed 300 m2 esccultée dins du sape (1800 tonnes) , qui rassane pu 150 personnaches.
Sainte Anne d’Auray in Bertane : crèche vivante
et bin d'aut' incor ......