l’ souris du fond
par kiki le, 19/12/2007L’ Souris du fond
Approch’, souris, m’ bonn’ pétiot’ biête.
N’euch’ point craint’ : jé n’ té férai rien.
Té vos : j’vas esqueute m’ mallette
Pour mi t’ donner des miettes d’ pain.
Au jour, si t’es l’ terreur del femme,
Au fond à l’homme té n’fais point peur.
Bin au contrair’ , mi l’ premier, j’ t’aime.
Grêl’ souris, té m’ mets l’ joie au cœur.
Du mineur t’es l’ compagn’ fidèle ;
Il a quer vire t’ fin musiau.
Au fond de l’ foss’, t’ cri li rappelle
El’ jour et l’ gazoul’mint d’ l’osiau.
J’ sais qu’timps in timps, pétit’ coquine,
Té nous fais un peu marronner
In f’sant des tros dins not’ tartine.
Bah ! i t’ faut bin aussi minger…
Hein ! bomm’ t’ rong’ là-d’dins, heureuse ,
Qaund, par tierre, in obli’ s’ briquet.
Mais comm’té t’ sauv’ aussi, peureusse ,
Au moinder bruit qué l’ vint i fait !
Va , ch’n’est rien d’cha . Pu qu’ t’es du monne,
I faut t’ norrir… Pis, t’ ming’ si peu
Qué té n’ fais point d’tort à personne.
Souvint même in n’y vot qu’ du feu…
Qu’ j’aime à t’ vir, continte et légère,
Courir, banqu’ter l’ long des caillaux.
Oh ! comm’, dins t’ sort, t’as l’air dé t’ plaire,
Malgré l’ peu d’saquois qué té vos.
Va, gambad’ trott’, gambade incore.
Pu qu’té t’ plais dins t’n’obscurité,
N’ cach’ point à vir chus qué t’ignores,
Té n’connos rien, rien n’est r’gretté.
T’ n’es point non pus, bin sûr, sans peine.
Parfos, un méchant galibot,
Pou t’avoir, queurt à perde haleine
Et veut t’écraser sous s’chabot.
J’ sais bin qu’ du côté d’ l’écurie,
Si, d’ hasard , té dirig’ tes pas,
Té risqu’ beaucoup d’ là laisser t’ vie,
Egorgé sous les griff’s des cats.
J’sais aussi du’ dins les moumints d’ grève,
Quant té n’ vos pus les carbonniers,
Qué l’ pain i t’ manqu’, même qué t’in crèves,
Ti qu’ té veux vivr’ si volintiers !
Ah ! j’ t’ai r’marqué. Ces lend’mains d’lutte,
In veyot comm’ t’avos souffert,
Tout déhanqué, t’ tiot’ panche à vute,
Parfos mêm’ les quat’ patt’s in l’aire.
Mais n’parlons pus d’ ces triss’s affaires :
Nous avons du pain à plaisi,
Nous brairons quand i s’ra temps d’ braire,
Viens faire l’ festin aujourd’hui.
Approch’, souris, m’ bonn’ pétiot’ biête.
N’euch’ point craint’ : jé n’ té férai rien.
Té vos : j’ vas esqueute m’ mallette
Pour mi t’ donner des miettes d’ pain.
Extrait de Croquis au charbon, 1899
Œuvre de Jules Mousseron