Epiphanie, Légindes et Symboles

L’Epiphanie, ch’est achteure pou nous tertous l’Fiète dus qu’in arsaque el fève du gatiau des Ros.
Porquo eine fève ? Ch’est eine histoire bin lonque à conter.
I fot s’arrap’ler qu’dins l’Intiquité, in cultivot partout el fève, un légueume riche qui sortot in preume dé l’tierre. Cuite ocore molue in farène, alle norrisot bell’mint les gins. S’forme arsannot à l’imbryon humain, aussi les Egyptiens disote qu’alle cont’not l’âme d’infant à naîte. Les grecs disote qu’alle cont’not l’âme des morts. Ainsin Pithagore i’a été estoqué (tué) au combat pasqu’i n’volot pon traverser un camp d’fèves. Les hébreux i s’servote dé l’fève noirtes et blanques comme bull’tin d’vote. I élisote ainsin leus chefs ed guerre, magistrats et Ro d’banquet pasqu’in fasot pon un banquet sins élire sin Ro. Les grecs et les Romains i l’z’ont imité.

Pis i fot aussi s’ramintuver qu’dins l’Intiquité in fiètot el Solstice d’hiver, jour dus qué les jours rallongte. Ainsin, égyptiens fétote el Diu Solel Amon-Ra, les Perses el Diu Mithra qui arnassot ch’jour là dins eine grotte, un culte qui s’ra adopté pa les sodars romains. In pusse, les romains, vénérotte pindint 7 jours (les saturnales) el Diu Saturne qui amène el prospérité pa l’agriculture. Ch’tot des fiètes aveuc plein d’excès et orgies. Ainsin les sodars romains élisote aveuc eine fève el Ro dé l’fiète. Cha s’fasot alintour d’eine grante tape aveuc un gatiau chu qui arsanne (ressemble) gramint à not’ fiète d’aujourd’hui. Pindint l’durée dé l’fiète, in donnot à ch’Ro chu qui avot d’miux à boire et à minger, i commindot maîtes et esclaves ; in li présintot les pus grantes marques et d’respect (in atreuv’ra cha dins l’fiète ed Seuts du Moyin Ache). Et à l’débout dé l’Fiète, in l’estoquot (tuait) sovint aveuc eine corte alintour du col ! Et ouais ! Pasqué l’Ro étot coeusi dins les criminels condanés à mort ! Nous, héreus’mint in laisse not’ Ro in vie ! Ouf ! diront ceusses qui treuv’ront l’fève el 6 Jinvier ! In 1870 , dins Paris assiègé,un boulinger rimplach’ra l’fève naturelle pa eine tiote figurine in porcélaine. In’d’a qui in font collection, cha s’appelle el fabophilie pusqué l’nom sciïntifique dé l’fève ch’est vicea faba major. I n’d’arot 20000 au musée d’Blain (75 Km au sud d’Rennes, 02 40 79 98 51 , ouvert l’après midi),

Bon, mais porquo in dit gatiau des Ros ? Ebin Chés Ros, ch’est les Ros Mages ! Arvénons cor lon in arrière au momint dus qué l’christianisme i s’met in place. Ch’ti chi vot d’un dreule d’eul les Saturnales et fiète du Ro pasqué in s’moque ed tout ,y compris des réligions. Alors s’met in plache el léginde des Ros Mages. Dins les Evingiles St Luc i n’in pale pon, St Mathieu i dit qu’i’a des mages qui arrivte ed l’Orient pou vir l’crèche. Mais i dit pon l’nompe ni précise qu’ch’est des Ros. In ç’temps là, des mages ch’étot des saches ocore d’z’astronomes (i etudite l’z’étoiles) ocore des astroloques (i diste l’av’ni aveuc el mouv’mint des astes). Alors in peut busier qu’l’imaginaire des prémiers chrétiens va imbellir l’histoire. I vont imaginer qu’i a 3 Ros Mages, ed 3 races et d’tros âches différints. Porquo 3 ? Pasqué ch’est un chiffe sacré. Ch’est l’symbole du nompe ed continents (Europe, Asie, Afrique ; les z’aut’ i sont cor pon connus), symbole dé l’Trinité qu’in artreuve dins toutes les réligions, symbole du nompe des fils ed Noé (nombe ed races), symbole du nompe ed cadiau des Mages (or, incens, myrrhe), symbole des 3 aches dé l'vie. In arprésinte chés mages d’pusieurs manière. A l’Perse, ch’est grand mantiau, bonnet Phrygien, maronne inserrée dins l’bas. In Tartare, ch’est capiau Gengis Khan, tiot mantiau, rope dusqu’au g’noux, chinture et bottes. Au début, in l’z’app’lot Melichior, Bithiserea, , Gathapsa. Ch’est dév’nu Melchior, l’pu vieux à grante barpe, blanc, qui offe l’or , symbole dé l’Royauté pis Balthazar, l’noir barbu, homme mur, qui offe el Myrrhe, symbole dé l’souffrance rédimptrice d’Jésus su Tierre et Gaspar, l’pu jonne sins barpe, l’asiatique qui offe l’incins, symbole dé l’divinité. I’a daut’ légindes qui moute chés Mages autermint. Mais dins tous les cas, les 3 Ros Mages arprésintent toutes les races su tierre ,tous les aches. Ch’est bin tard au IV sièque qu’in dira qui sont tros et au X ième qu’ch’est des Ros . Ch’est bizarre, l’z’initiales d’leus 3 cadiaus cha fait OME (Or,Myrrhe, Encins) . Coïncidince ? Comme dins F’Fève in artreuve F’EVE (l’fimme Eve) ! Dreule !

Epiphanie vient du grec epiphania qui veut dire apparition ; obin in l’cope in « épi » = au dessus » et phanos = leumière ; chu qui voudrot dire el leumière ed Jésus alle est padzeur nous z’aut’.
Aisin pou les chrétiens, l’Epiphanie rapelle in preume l’présintation d’Jésus aux Ros Mages mais aussi s’circoncizion (7 jours après s’naissince ; à ch’mimint l’an l’preume ed l’an ch’tot l’preume jinvier pou les chrétiens) , et pu tard sin baptème , l’miraque des Noces ed Cana.
Mais les fiètes payennes continuent si bin qu’in 354, el pape Libérus i fait mette Noël el 25 décimbre pou faire oblier les fiètes payennes. Et i warde el 6 jinvier pou l’Epiphanie.
Maugré cha l’coutume payenne du gatiau aveuc s’fève, continue eine milette et alle arprind bell’mint au Moyin Ache , aveuc el Fiète des Seus. Quaind in cope el gatiau, in fait autant d’part qu’i’a d’convives pusse 1 , el part ed Diu ocore el part du pauffe. Comme cha si i n’d’a un qui buque à l’huche, i aura à minger. Quaind in prind un morciau , un gamin plaché pad zou l’tape désine l’peursonne qui ara ch’part là . Cha s’fait cor !

V’là mes gins , légindes et Symboles dé l’Fiète des Ros ! Et i’arot cor à dire su chu qui s’passe dins l’z’aut’ pays et réligions !

Tiot Rital Estrait d’sin tiot live : Légindes et Symboles des Fiètes

Bonsoir à tertous, j'n'peux pas m'inpêcher d'mette in tiot mot pour l' Tiot Rital , qui me ravit incor et incor avec ses textes qu'j'viens d'lire sur l'épiphanie, Légindes et Symboles.
Eune tiote question qui ché qui va ete l'roi ed tous ?
Très bonne épiphanie à tous et Adé mes gins.
Kiki de Liévin.