Alexandre Derousseaux

Alexante DEROUSSEAUX pére dé l'Canchon Dormoire dite "P'tit Quinquin"

El 1er juin 1820 à 11 h du matin , à Lille , au 120 dé l'Rue St Sauveu,au 1er étache, pa d'zeur eine tiote épicerie , Cath'rine Vandervinck , 36 ans, sin ouvrache, mariée à François Joseph Derousseaux 46 ans, pass'mintier, alle met au monne un garchon , Alexante Joachim .In ç'timps là , St Sauveur ch'est ein quartier misérape, ein labirinte d'courées, d'rues étrotes aveuc des cafes humites, duss qué ress' les overriers . Ch'est là qu'Alexante i va passer s'n'infance, in apernant l'durte vie ,in preume à s'batte cont' les gamins d'z'aut' quartiers seurtôt ceusses ed Wazemmes.
Mais l'tiot Alecsante i va vife din ein monne d'musique et d'lifes. S'pére violoneu i l'immène din les bals d'quartier pis tard i va l'inscrira au solféche du Conservatoire d'Lille. A 6 ans (ouais 6 ans !) i ouéve chez l'tisserand Wilmot, amateu d'lifes et d'canchons, qui l'incourache à canter et li apprind à à canter et seurtôt eine milette à lire pasqué in ch'temps là, i'a pon d'école.

A la mort dé s'patron, Alexante i d'vient aclopin (apprenti ) din eine imprim'rie, pis chez ein tulliste et infin chez l'tailleu, Henri Bunel, cor ein passionné d'lecture et d'musique. Saprée chance ! S'patron qui cante des airs d'opéra et jue des tirates classiques ed'vant ses overriers . I'imm'nra un cop Alecsante au téâte et du cop i c'minche à composer d'tiotes mélodies. S'patron i fait connaite à Alexante un auteu populaire du siéque dernier, François Cottigny dit "Brule-Maison", mercier ,qui passot ses dimanches à vinte ses canchons picartes. Assisté pa s'patron, Alexante i'apprint à lire din les pasquilles d'Brule-Mason pis pu tard, pou miu apprinte, i va suire les cours les cours gratuits du conservatoire municipal. I laisse kéir ses comarates pou passer s'rare timps lipe à désivorer les lifes dé s'patron : filosofie, classiques, grands écriveus.
A foque 15 ans(!), Alexante i'écrit ses prémières canchons d'carnéval ,in frinçais pis aprés in picard, qu'i cante li-menme din les rues, estaminets ,sorties d'fabrique ("Clistorelle" ,"Marcands d'canchons" , "Mon p'tit amant" etc). A 17 ans, i archot s'livret d'artisan qui moute commint i'étot: 1m60 ,yux gris bleu, caveux chatain , nez moïen, rond minton. Chu qui n'est pon marqué ch'est s'malice, s'grante cordialité ! A 18 ans i publie s'prémier réqueul pou ses comarates d'ouvrache. In 1840 ch'est l'prémier succés aveuc s'canchon "Spectacle gratis". Cha raconte el misére d'un jonne coupe qui veut daller à eine séance ed théâte gratuit mais i'a bin treup d''monne, i verra arrien . In 1841 i part soldat pou 7 ans au 46 iéme régimint d'infant'rie à Caen, comme musicien-instrumintisse ; ainsin i apprind à juer dé l'clarinette. In 1843 i pierd sin pére. I s'marie in 1846 et finit sin service militaire in 1848 ! I artreuve s'mére malate qui resse à l'débout dé l'cour Jeannette à vaques qui donne su l'76 Rue St Sauveur . El même année ,i réunit un récueul dé chu qu'i'a d'jà écrit. Ch'est l'succés ! Cha li ouve ein ouvrache au Mont d'Piété pis après à l'Mairie d'Lille. I pourrot vife aveuc es pleume mais i preufére rester monter les grates, un à un. 1 finira Directeu d'l'Octroi .
Dérousseaux i compose des canchons in picard qui aront plein d'succés pasqu'alles sont gaies, parl'te dé l'vie à Lille, des z'overriers et tiotes gins comme li : les dimanches à l'guinguette, l'nuit d'touque (folie) dé l'brad'rie aveuc ses greusses farces,dé l'fête des dintéliéres,d'l'espectaque des marionnettes din l'sintimint d'toubac et l'tintin des cris des gins etc . In l'ermeude din plein d'concerts pou ram' des doupes aus pauffes ! In 1853 ,i vot l'misére d'eine jonne dintélière qui n'arrive pon à faire taire es n'infant qui braie gramint.Adés, Dérousseau i'écrit eine berceusse "banale" qu'i dira , "La canchon dormoire". Ch'est l'esplosion ! Partout duss qu'i va ,i dot l'canter ! I'accepte à condission d'printe din ses bras eine poupée obin quéque cosse qui li arsanne ,eine botelle intourée d'eine loque ! El canchon alle va faire el tour du monne !
In 1861, Dérousseaux i va archévoir des mains du Baron Anatole de Melun eine médalle dé l'Société des Sciïnces, d'l'Agriculture et des Arts. Ch’menheer li dira qu’ch’est des tecstes foque bons pou l’z’overrierses:

In 1856 ,à 36 ans i s'marie aveuc Marie-Augustine Bracke.
L'réussite n'l'impêche pon d'continuer à écrire et d'composer . Ainsin i'ara à s'compte 350 canchons ! D'no jours in cante cor "L'habit d'grand'père " ! Epis i sort, inter 1851 et 1870 , 5 tomes des "Chansons et pasquilles lilloises ", es n'euve majeure, pi in 1861 , 2 récueils "Mes étrennes" et in 1885 " Mes passe-temps". In 1888/1890, i sort eine oeuve armarquape : "Moeurs populaires de la Flandre", in 2 tomes,duss qu'in artreuve l'plus greus dé l'littérature orale du Nord : dictons, proverpes, contines etc Et cha, sin quitter s'n'ouvrache à l'ville d'Lille. I warde s'simplicité, cache mie dév'nir borgeos : i busie rester "imbassadeu" dé l'classe overriére ! Chu qui rind cor pu populaire tell'mint qu'in 1884 i archot el légion d'Honneu armise pa l'Général Faidherbe. Cor miux !In 1888, aus z'élecsions municipales,sin qu'i l'ermeude, s'nom i'est marqué su eine liste ! Foque un tiot avantache dé s'montée in grate, s'n'appartémint rue Esquermoise.

Aujord'hui,d'z'intellectuels,binn à l'coïette din leu ouvrache d'culs à laine ,arproch'te à Dérousseaux d'êt' ein écrivin presque treup parfait, à l'frase élégante mais sin seurprise , d'avoér eine gaité eine milette forchée, d'moutrer ein monne étriqué, sin grandeu. Ch'est p'têt' vrai mais i z'obli'te ed vir qu'Dérousseaux i'a vi ,dzou Louis XVIII, Charles X, Louis Philippe, l'République II ,l'terripe condition overriére épautrée (écrasée)pa l'frousse des donneus d'ouvrache ! In ç'timps là, pou l'z'overriers , mie plache au rêve,i folot treuver à mier in ouvrant pusse ed 12 h pa jour ! Ravisez ses contimporains Hugo,Balzac, Bizet et Cie, i déquintent pon d'overrier ! Pou eusses,écrire ,composer ch'tot quain même pu facile !

S'vie alle finit el 23 novimpe 1892. Su l'quémin qui l'imméne au cim'tiére ed l'Est, eine flopée d'gins cante el " Tiot Quinquin" . El mason natale d'Dérousseaux alle abritot el mairie dé l'commune lipe ed St Sauveur et su s'fassade in avot mis des plaques in s'n'honneu. Aujord'hui ? Arrien d'tout cha ! El quartier St Sauveur du temps d'Alexante i'a été brisié,rasé et arcovert ed bâtimints modernes ! Pou s'ramintuver ed Dérousseaux, i'a foque l'monumint du P'tit Quinquin, fait in 1902 pa Eugéne Despléchin, in bordure dé l'rue Nationale à Lille. Mais l'tiot gardin qui intoure l'estatue i porte mie s'nom ni ch'ti dé s'canchon mais ch'ti ..d'Foch, el maréchal ! Quelle injustice !

Et quaind in busie qu'pindint 1ére guerre mondiale, in Allemane ,din les camps d'prisonniers frinçais, in cantot l'Tiot Quinquin pasqué l'Marseillaisse alle tot interdite, in mésure bin l'ingratitute d'nos gins politiques ! Seurtôt d'no mayeurs et mayeresse lillos qui s'dis'te pou les overriers !

Pseudo Tiot Rital ....Estrait dé s'life "Poêtes ! Poêtes ! "