souvenir d' odeur
par minloute le, 07/03/2008hier j a été faire ech plein du bidon d essence pour mette dins l tondeusse, au prix d' l essence , in s' diso si in allo pas acater un mouton pour faire el' pelousse ...
in r'venant , cha sinto un tchiot peu l' essence dins l' carette et j' me suis arvu dins l' 403 à min père dans les années 66 70.....
ché vrai qu' à ch' t époque, chéto un tchiot peu plus "spartiate" dins l' confort , que se so du bruit ah l'fameux bruit des essuie glaces, ouin ouin, ouin ouin, qu in arrivo à intinte au d'sus du bruit du moteur, qu' à ch' momint là té savo que t avo un moteur dint' carette, achteure i a des coups quand té au point mort té pourro douter que ch' moteur i tourne, mais là in s' poso pas la question
ah l' odeur ed l' essence dins l' carette, j' me souviens pas si cha v'no du réservoir, ou alors du bidon in plastique qui y avo dinch' coffe au cas du qu in quérro in panne
pasque chéto eune espédition in tout cas à mes ziu, j avo 6 ans , quand qu on quitto l'région pour aller rin qu in région parisienne et comme min père y a été in r'traite in 1966, dès l année suivante, in a comminché à silloner la france pindant ché vagances , et à la reflexion, j connaisso bin plus la france à 18 ans qu' min garchon au meme ache
ché pas qu on éto des miyardaires, mais mes zautes soeurs et frères étotent pu al' charge d' mes parints, donc j in a profité .....
odeur d'essence dins l' carette , pas d' climatisation aussi, ché serviettes qu in metto su ché banquettes in cuir ou en skay pour pas s' bruler les fiesses in s asseyant ....
pas question d' péaches et d autoroutes, nan j' me souviens d' eune reflexion d' min père, "si t as eune panne , vaut miu et' sul' nationale, y a plus ed' garaches", cha a bin cangé, combien qu in in vo d' vestiches d' estations essence sul' bord ed la route, et des garagisses , à part dins ché villes moyennes ou grantes, t in vo pu beaucoup dins ché villaches
tchiot, in auro pu m' comparer al' base ed kourou in guyanne, pasque pour lancer des feusées, j éto fort .....
j' éto toudis malate, in devo faire des haltes sul' bord ed la route pour que j ardégueule min tchiot déjeuner, chéto recta , pour mi j in su sur, chéto l'odeur ed l 'essence qui m'incommodo
j a tout essayé ou plutot in m a fait tout tester, médicamints, so à boire so à avaler avec eune tchiote cuillère, meme qu in m a mis un coup du persile accroché à un bouton près du coeur, parait qu' cha impécho ed' dégobiller, pas mi......
l' 403 break, couleur grisse à min père chéto eune voiture d' occasion, un vrai tank, t avo l' temps d apprécier les paysaches dans les montées cha chéto sur ........
pi aprés min père i a eu eune 204 verte toudis d' occasion, et là chéto l' lusque in comparaison
j in ai arvu eune y a pas longtimps, in déchante, quand qu in est tchiot et à ch' t époque là chéto déjà eune révolution ch'te carette par rapport aux anciennes, j' me diso in l' ravisant , vu l' étroitesse del' carette et la largeur des pneux, t eut' dit qu in a eu du courache rétroactiv'mint à traverser la france avec ch'tacot là......