des fossiles à ch'tas d'schistes ed'Grenay
par wallart le, 20/04/2008J'avos l'âche ed'sortir dins ches bals quand eine envie, pas ordinaire, m'a prise par el'main. Avec des copains deul'Cité 40, ein allot querre nou trésor à ch'tas t'schiste : des fossiles !!
Ein étot eine bante ed' chinque ou six gars déterminés, toudis les mânmes, et pi, j'vas vou l'preuver, ein y croyot tellemint, et qu'rien i aurot pu nous détourner ed'nou mission.
Ein cachot, ein r'tournot del'vieile gayette, ch'étot à chti qui trouverot ein fossile préhistorique ! Ein rêvot, ché sûr !!!
Des fos, les camarates, i treuvotent des drôles ed'formes su ches cailloux : un rond, chétot toud'suite ein hommache à Sainte-Barpe, un carré : ein messache d'ein malheureux al'fosse, un trianque : un appel au s'cours...
Ein n'a ramassé des tas d'cailloux, mais tous, au fond, i zavottent un point commun : à bien y r'garder : i zétottent tous en forme ed'coeur !!
Eine passion, ein amour ed'sin pays, ein respect ed'l'ouvrache ed'sin papa ou de s'maman. Pour un peu, ein aurot même porté autour ed'sin cou es'trouvaille, fièremint.
Pour eim'part, j'na jamais treuver aut'kose qu'des fossiles ed'fougères. Pas d'quoi fouetter un ka ! Mais j'les gardos comme in garte des trophées !
C'que j'artiens ed'tout cha : ch'est l'aventure, les films qui peufent ed'passer par ed'tchiête dins ché momints là, y'a pas d'comparaison !
Et pi, c'qui m'resse aujourd'hui, ch'est surtout el'douceur et l'couleur profonte d'un bout d'carbon dins t'main. A l'époque, j'avos d'jà eine pensée pou ches gars qui, au Fond, à l'sueur ed'le front, extrayotent el'pierre noire !
Bref, tout cha m'manque. Chés corons, chés gins, Grenay, "Bully-sans-Mines", min Grand-père et m'grand-mère, em'Cité 40....
A chaque fos qu'j'armonte din min pays, ej'peux pas m'impêcher d'artourner vire min "tas d'schiste", inévitape ! Em'seule crainte, qu'ils d'démontent un jour pou ein faire un musée. Ech'jour là, ché sûr, em'histoire alle s'ra vraimin dev'nue ein fossile !
Nostalgie, quand tu nous tiens !