l' nom des pieches dins l' mazon

am'mason , in appel'o l'pieche du qu in faiso à minger, l arriere cuisine, l' pieche du qu in mingeo l' cuisine, l' pieche du qui a eu l' télé , la grante pieche, et l' derniere qui donno sul' rue nationale l' pieche ed' devant

pi y a eu l' télé qu ale est arrivée

au début in l' raviso autour del grante tape qu in avo, pi en 1970, sine ed' fierté pour mi , mes parents zont acatés un salon
un bio salon , avec eune banquette et des fauteules in bébé squaille noir
et là l' y a fallu tout chambouler l' mason, ché meupes zont attéris dins l' pîeche ed devant , et ché comme chi dins l' grante pieche tout y a été fait autour del' télé

in plus du salon , min père i a acaté ,tros chosses essentielles pour eune telle pièche
d' abord ch' porte revues
pi ch' fameux cendrier in fer sur pied , du qu' t appuyo su un bouton au d'sus et qu'cha faijo déchinte in tournant eune plaque in métal, pi qu ale armonto si t artiro tin do

sans oublier et cha chéto à mes ziux un lusque pasque chéto pas vraimint utile, eune tabe basse
l' grante pieche ale a été débaptisée , ale s a appelé "salon"

chéto l' premier investis'mint "plaiji" ou "confort" qui zont fait mes parints

faut dire que j avo toudis vu m' mère , agir in économe , à arsortir des liffes d arcettes qu ale s éto fait in découpant d' zartiques dins ché journeaux, arcollés dins zin cahier, ou in ravisant dins des liffes austères qu ale avo, pour mi austères, car y avo pas d' photos, que des zarcettes.... ale préparo ché menus à l avinche pour acater c' qui fallo, sans trop d' froufrous, bon ché vrai , j' pinse cor à m' soeur qu ale ravisse tout c'que j' mets , ale va cor dire "ah mais ti te plains pas, této ch' chouchou, arrivé bin aprés les zautes, nous in n a pas connu cha , nous n à l acouter bin sur, in éto éclairé avec eune bougie in suie, et manman ale allo laver ch' linche au bord d' la lawe......"
mais j' me souviens aussi , cale faijo prudemmint et méticuleus'mint ché comptes dins zin grand cahier , chéto du sérieux d' tenir un budget et là, vire arriver eune télé, pi moins d un an aprés un salon, comme dins ché films , mi tchiot d' 10 ans j éto fier
ah j avo oublié , cor plus clinquant à mes ziux, zont acatés eune desserte à roulettes du qui avo ché zapéritifs et qui trono au coin du salon
que lusque , comme dins ché flimes j' diso, d' boire sin apéritif au salon

achteure min père i est pu là, ch' salon y a été cangé inter temps , i fatique aussi , faut dire 2 salons in 40 ans chéto quand meme pas la folie des grandeurs

au coin du salon, l' desserte ale est cor là , avec ché bouteles apéritif et ché liqueurs, liqueurs qu' ale zont l' temps des' sucrer cor in peu plus car personne les bo pu

Du minloute comme cha ch'est un retour dins l'passé comme in a quere, i peut nous in servir tous les jours
tout c'qui dit j'l'ai vécu à pleine boucquie et ch'étot un momint inoubliape
note condition sociale al s'a améliorée tout duchemint, in buvot un apéro l'diminche
su l'photo de l'cuisine à mémère, Grenay au siècle passé, la cité du philosophe le 05/10/2006, in vot sin cendrier orange comme minloute i décrit
j'l'ai toudis connu mais je n'séros pas dire dù qui est passé.