Merlimont sous l' pleuffe

que angoisse au matin, quand qu in soul' vo douch' mint l' rideau rouche del champe pour vire l'temps qui allo faire...

y avo des jurs exceptionnels du que chéto djà grand bio temps alors là chéto toute eune organisation comme chi fallo pas manquer eune minute de ch'te journée et pi in savo qu in allo aller tro coups al' mer , au matin pour ché crevettes et meme si si ché arrivé, s' baigner, l' aprés midi baignatte, et l' soir , tour sul' plache ....

mais in vivo aussi l' aut' scénario : té soul' vo l' rideau et rin qu a vire l' ciel et ché gins passer à vélo ou à pieds in kaouais , t avo compris ....

l' sape y allo éte tout mouillé et coller à ché zespadrilles ou ché sandalettes in plastique

quo faire l' matin , un matin d' pleuffe ? d' abord cacher aprés eune éclaircie qu ale permette d aller querre ch' pain inter deux drachées
j' me souviens qu in faijo meme ché courses in plusieurs coups, rin que pour faire passer ch' temps, ouais qui dijo min père i allo faire meilleu l aprés midi....alors in allo querre ech' pain pi eune fo arvénu in allo querre ch' journal

querre ch' pain : là l' temps i éto comme l' visache del' boulangère , véritape assistante sociale, prete à pleurer avec chti qui voulo si i parlottent du temps qui faijo ,ah ale brayo et comme dijo min père ale brayo pasqu ale avo peur que ché gins i partent et qu ale fasse pu ché zaffaires

dinch' magasin chéto frois'mint d' kawouais, artirache ed capuches in plastique, arpliache ed parapluie, essuyache des verres ed leunettes
sans parler des momints terripes du qui dracho à toute blinte dehors, là d' dins ch' magasin chéto embouteillache inter ché gins qui zavottent acatés mais qui restottent ed dins ch' magasin in implorant ch' ciel pour que l' pleuffe al' s arrette , y avo ché gins qui rintrotent in trombe dinch' magasin et pas forchémint des gins qui aurottent acaté mais rin que pour s' mette à l abri, sans parler des gins qui faijotent la queue ............

aprés i yavo toudis un premier matamore qui bravo l' pleuffe rin que pour s' faire vire , et vu l' blancheur ed ché mollets d' co as' plache, j' m' auro camuché derriere ch' premier v'nu ...

pi aprés i n avote eune personne qu ale éto in tchiot peu plus sinsée , et que machinal'mint al' donno l' signal du départ en déployant sin parapuie.....
pi aprés in y allo , in sorto du magasin, du que l' odeur du pain , des gatiaux , as mélingeo avec celle d' l humidité des vet' mints des gins ......
y avo qu in plaiji ach' momint là chéto d' rintrer al' mason in sautant par dessus, enfin quand qu on y arrivo, au d'sus des flaques d io

in s amuso toute el ' route , mais avant d' rintrer in prenno eune tete d enter'mint avant que s' mère ale disse quéquosse sur ché pieds trimpés
"t as cor sauté dins ché flaques ?" "nan m'man, mais y avo d' lio partout"
in s' défindo comme in pouvo ...