Les jardinsIn direct ed’Merlimont !
par Hervé62155 le, 11/07/2008Pour rassurer Minloute, j’dira que rin n’a cangé à Merlimont : un cop, i fait biau, un aut’cop, i fait…moins biau ! Lundi, te t’seros cru in novempe : i faisot gris, i queot d’zaverses et i faisot un vint à décorner ché bœufs !! Mardi, i’avot cor du vint mais i avot du soleil. I faisot pas grand caud quind même. Mercredi et jeudi, grand’artour d’el pleuffe et du vint… Et bin sûr, ces matins-là, y avot du monte à l’maison d’la presse (el’ même qu’avant !), avec tous des jones qui acatotent des liffes et i avot la queue à l’boulangerie (l’boulangère, ch’est pu l’même que quand in étot tiots, mais chelle-là aussi, al a peur que ché gins i sauvent !!) !
La plage, al étot un tiot peu déserte. I z’ont pourtant armis ch’Club Mickey (disparu y a deux ans) mais i avot que trois-quatre jones in train d’sauter su ché trampolines ! Ché après-midi, keke courageux avotent pris leus cayelles pour aller s’rassir à la plage intre deux z ‘averses. In revinche, i a un monte fou su la route : quand ché gins i peuffent pas aller à la plage, i roulent (malgré ch’prix d’l’essence !). Toudis est il que cha fait eune paire d’années qu’ch’est l’même cose : quand in travalle, i fait biau (in a eu de fort belles journées in mai et in juin), et quand in est in vacances, ch’temps i cange !!!
Quand j’étos tiot et que j’venos in août in vacances ichi à Merlimont, i m’semble qui faisot plutôt biau. Ou alors, in s’rappelle que des bons souvenirs ?
P.S. : Miracle ! Aujourd’hui, i a fait biau ! Ch’étot ch’marké ch’matin, ché gins étotent contints !
