les repas d' famile

ah ché r'pas d' famile, j a pinsé à cha hier, in allant m' promn'er in carette avec grand mère et l' tchiotte
in a vu cha sul' route, enfin d'vant un restaurant, chinquante carettes à garer, pas eune du départemint, tro heures pour faire eune maneuffe pour garer les quat' quat' qui saffent pas s in servir ......
et ti te reste au volant d' eut' carette et comme té peux rin faire que d attinte, t' opserve

y do y avoir l' monnonque qui a djà bu eune paire d apéritifs avant d arriver chi qui fait djà l' circulation, au miyeu del route, des joues rouche pivoine, l' cravatte à motié artirée

ah i protéche avec sin corps toutes ché carettes qui s' garent tant bien qu' mal
ti té ravisse ché gins qui ont garé leu carettes et qui traversent pour aller au restaurant , "tiens cheu là rin qu a les vire i doffent aller au catéchisse, ch' garchon cha do et' pierre mathieu ou charles adrien, l' file marie franssoisse ou marie isabelle , pi quand té vo qu in' nont eune flopée d infants ,et qui s' suiffent à environ un an d écart, té peux et' sur qui zarmettent l' couvert à peine que grand mère ale est arssortie del maternité ......

aprés ichi cha do et' un grand onque et eune vielle matante, i sont pu jones, ale a mis s' belle rope daxon , savez ché ropes incroyapes, du plus pur camouflache in amazonie avec cha ah ouais, i zont fait des tests bin au miyeu d' la jungue amazonienne si ché femmes al' mettent des ropes daxon in les vo pas, in les confond avec l' nature autour, tant ché ropes ale sont aussi bariolées que ché zarpes .......

aprés in vla d autes qui sortent d' leu carettes, mon diu que malheur, i est bio chti chi, ah quand t as vue l' tronche à grand mère, té peut dire qui s' arsonne s' rassempe, mais hélas i zont fait des gosses , tout leu portraits et quand que j' dis cha ché pas un complimint, l' seul avantache ché qui zont pas b'soin d ' d'minder d' faire un tesse adéenne pasque comme in dit ché écrit sus' guiffe qui arsonne as' mère, et là l' phrasse qui tue "maman sur , papa peut et' " ah ché malin comme phrasse ché comme "ya pas d' finquée sans fu"

aprés bin sur in a quand meme eune paire qu ale sont bien, ouais ché pas tout à armette au r'bus quand meme

ravisse ichi l' rope, bin avec cha après ale peut aller dinch' camp in face, ché cornales ché sur qu ale vont pas v'nir

ché vrai in est d' fameux moqueux d' gins , vous m' direz in n' a qu' cha à faire que d' médire , ché pour passer ch' temps
bon cha y est in va pouvoir y aller, toutes ché carettes ale sont garées, mais y a cor mononque au miyeu del route, du genre "zavez vu hein , in gene pu hein, ché mi qui a fait l' circulation hein" mais pour vous y est cor sul' route ..... un peu dur l' garchon pour l' détinte

zallez dire , que moqueux d' gins minloute, mais j' me dis que cha nous est arrivé aussi d' faire d' grantes réunions familiales, et qu in a du aussi boucher l' rue in momint , et que certain'mint y a du y avoir d' zautomobilistes qui eux aussi ont du nous "rhabiller" l' temps qu in so tous garés