les concours ed gardins

dins l'temps au 3 à Bruay y avot un concours ed gardins, chétot au mois ed juin i m' sempe. chétot ech' ti qui devot avoir el pus biau gardin alors dès l' primtemps les mineurs et les artraités i s'activotent.
el jour J, y avot un jury composé notammint ed l'adjoint au maire qui passot dins ché corons pour noter les gardins qui donnotent devant ché maisons. j'em souviens pus el nature des prix attribués, sauf un.
ej m'explique: y avot un ancien porion qui restot tout un haut d'ech boul'vard Basly. i avot été porion à l'fosse 3. i a jamais fait sin gardin ed sa vie à tel point qu'ech'l'hierpe ale dépassot d'esse barrière et ben malgré cha i avot toudis un prix, chétot un sac ed désherbant, comme quoi inch' temps là, chés gins i z'avotent ed l'humour. li i s' vexot pas au contraire, i les faisot rinter as' mason pour boire un verre, des fos quand i sortotent ed là i in a z'étotent pas clairs, parce qu'el personnache in question chétot un sacré buveux i faisot tous chés cafés ed bruay, combien fos qu'i l'ar'trouvotent plier in deux sur esse barrière parcequ'i étot pus capape ed tirer sin verrou pour rinter.
des fos min parint qui restot deux portes au d'sus i allot boire un verre as' mason, et qui yétot pas el dernier nan, ej vous laisse deviner la suite y avot à peine cent mètes qui séparotent ché deux masons mais des fos el quémin i étot long pour li arvénir.

Après y a eu les concours ed masons fleuries mais cha ch'est eun' autre histoire et mes souvn'irs sont trop lointains et imprécis pour qu'ej mette un artique là d'sus. tout qu'esse j'em rappelle ché que des fos ché visins i s'disputotent à cause ed cha du genre: ché mi qui va avoir el premier prix etc..

ouais che vrai et cha existe incore, tous les ans ichi ils l'font cor, quand t'as parlé del' devanture d'ech porion j'ai pinsé al' mienne che parel, sauf que mi in m'donne pas ed desherbant, j'vas réclamer