Nou vielle mason, Ch Bruchet .

NOU VIELLE MASON
Poème de Charles Bruchet, Noeux les Mines (1925-1989)
Extrait du recueil de poésies publié en novembre 1977 à Noeux les Mines

Iavot longtemps qu'in l'ravisot,
In s'in allant à nous gardin,
Chétot l'domaine des osiaux,
Et l'herp' all y poussot in d'dins.

Ch'ell vieill' mason abandonnée
Et qui n'étot pus à personne,
All' avot été soupçonnée
d'et' habitée par des fantômes.

Mais nou, que rien d'tout cha n'effraie,
Avons parti vir' Monsieur l'Notaire
Li proposant d'payer les frais,
Pour in dev'nir propriétaires.

In étot pas fort rich' à don,
In ouvrot sans compter ses heures,
Et l'viell' mason à l'abandon
fut payée avec nou sueurs.

Qu'all étot bell' nou viell' mason,
Qu'in avot tant rafistolée,
Ed' min camp ch'étot m' n'horizon,
Min coeur à l'vir iétot r'gonflé.

Rintré, j'ringeos mes affutiaux,
Et pis après, j'allos à ch'puche,
J'ar'montos un' sionnée d'iau,
Et à tabl', j' rimplissos ch'ell' cruche.

Que ch'étot bon les soirs d'été,
Souper avec el porte ouverte,
Et d' vir' onduler les camps d'blé
A l'infini ! la plain' tout' verte.

Et l'hiver quand el vint soufflot,
Faisant ployer tous les hayures,
Nou mason protégée d'alots
N'avot pas un' égratignure

Et que d'bon temps l'soir in famille,
A la lueur é d'nou quinquot,
De déviser l' consciainch' tranquille
Din nou mason bien arquinquée.

Et si vous érôtes vu mes tchots,
Quand in allot les mett' au lit,
Heureux, joyeux comm' des moniaux,
Nou viell' mason ch'étot leur nid.

L' matin quand l' co iavot canté,
Et qu'au loin l' solel i pointot,
In étot vit' décanillé
Nou viell' mason all' s'animot.

Jamais un' fos je n'sus parti
Sans m'imprégner d' l'air de l' mason,
El cour, l'établ et ch' l'appintis ..!
Tout m'inspirot un' oraison.

Mes gins j' vous parl' du temps passé,
Hélas ! pour chà j'ai des raisons,
Car l'autorout' pour y passer
Nous a chassés d'nou viell' mason.

Charles BRUCHET