une maison peut en cacher une autre
par minloute le, 23/10/2008rue Florent Evrard , eune tchiote mason zallez dire, et cor si vous saviez l' vérité , ché que qu à l intérieur, y a cor eune aute mason, qu ale éto l' plus tchiote mason que les zouillieres louottent y avo eune pieche devant, eune cuisine salle à minger , à l étache eune champe mais cor fallo s' pencher pour intrer d' dins
tout y éto pitit et ch' fourneau d' dins l' cuisine i faijo tout grand, in vivo dins chte pieche, et pas beaucoup d' leumiere qui arrivo d' dehors pasque i yavo des buand'ries partout, domaine des cats, et i fallo monter l escayer pour arriver au gardin qui éto au d'sus del mason
ché ichi qu habito Clara , décédée en 1995
in avo ker y aller, t arsorto d' là si té finquo avec des cartouches ed cigarettes, si t éto tchiot avec 4 kilos d' pommes , un lit' d' jus d' raisin d' marque Chaland.......
souvint quand que té rintro té voyo des zozios empaillés , accrochés such' mur, un grand buffet, mais vite té t ingouffro dins l' cuisine salle à minger
là y avo un osio vivant ch'tilale dins' cage, des photos souv'nirs d' pelerinache à Lourdes, eune photo d' sin frère in militaire , mort dans les années 1920, tro quate d' sin mari décédé , et sur ché photos l' temps in diro qui s a arrété
in devo s assoir, in faijant attention d' pas écraser un cat ou deux , pi in attindo, comme dins ché bistrot at faijo l' lisste de s qu ale avo à boire, y avo d' tout, nous ché zinfants in avo dro au jus d' fruits Pam Pam, l' temps aussi s éto arrété dins chte mason , j' me souviens y avoir été mingé, j avo 16 ans et djà un gros zappétit, mais ale savo pas faire dins l' bonne mesure, j' su sorti d' là , j auro pu rouler à terre ......
( 1 photos)