Son et leumière sins son

Salut tertous,

J'm'appelle batisse, j'chus du 59 et j'ai tché chu vous site par hasard, in cachint eune recette d'lapin au libouli.

J'ai nin trouvé.

Pindint qu'j'y étos, j'ai arwetchi un tiot peu chu vous ouvrache. Avint cha j'avos vu, à l'5 d'cheule télé, eune émission chu cheule visse Egypte. Ch'est loin, bien au-delà de l'Thiérache, t'as qu'à vir.

I n'd'a qui prétindtent qu'ches vis ros d'Egypte i avottent intindu parler d'ches terrils et qu'i z'in voulottent des mêmes dins leus gardins. Alors i z'ont creusé mais ches pauves malheureux i n'ont jamais trouvé d'carbon. Comme i z'étottent économes, ches ros i z'ont pinsé qu'finalemint ches terrils d'cailloux sins carbon cha ferot des bieaux monumint funéraires.

Et ch'est à cause de ch'l'aspect cimitière qu'in Egypte in n'peut nin utiliser ches terrils locaux pour in faire des soubassemints d'autoroute.

Dins ch'l'émission, in a vu qu'ches Egyptiens i z'ont laichi tout plein d'photos, mais i n'd'a nin un qui a pinsé à laichi des inregistremints sonores. Cha fait qu'in sait nin commint qu'i parlottent, même si in comprind quo qui z'écrivottent.

Ch'est comme ch'patos. Si un explique dins un life, à un savint d'Marseille, cheule signification des mots et cheule grammaire, i comprindra. Mais si i s'met à l'causer avec sin accint à li, cha va donner eune linque qu'elle a jomais existé, et i pourrot guider ches générations futures chu eune fausse piste.

I m'est aussi arrivé, i a nin longtimps, d'téléphoner à un boyau rouche qui s'appelle roger. Eh ben j'ai nin tout compris. J'ai mis cha chu ch'compte de l'ligne pourrisse d'France Telecom, mais i faut dire que ch'l'homme là i parle à eune vitesse... qu'in dirot un espinguouin. T'as qu'à vir!

Sins l'intinte in n'peut nin imaginer.
Mais sins l'intinte in l'imaginera jomais, si te vos quo que j'veux dire. (i paraît qu'dins vous clup i a eune guernoule qui comprind nin toudis tout. I paraît, mi j'in sais rin hein...)

Donc, sins vouloir vous influer, je m'permets d'vous faire eune suggestion: ch'est bin d'faire des imaches chu ches alignemints d'briques ou d'barraques d'gardin, mais cha serot incore mi d'les faire comminter par ches ginses qui vivtent d'dins (j'parle nin des ginses qui vivtent dins leu cabinets hein, ne m'faites nin dire quo qu'j'ai nin dit...). Comme cha in arot eune idée de l'manière que ches ginses i parltent.

I faudrot bien répertorier ches inregistremints hein, vu qu'd'un villache à un aute in n'parle nin parel. Sins parler d'ches origines. Ch'patos polonais, arabe, belge, 59, 62, 80, 02 et tout cha.

Vu qu'd'après ches statistiques de l'INSEE ch'taux d'fécondité i est assez faible dins ches majons d'artraite des secteurs miniers, i faudrot p't'être nin trop traîner. Et si qu'i a des reportaires chu ch'coin, faudrot p't'être les faire ouvrer un tiot peu, même si i sont pinsionnés de l'z'houillères ou de l'CNCF.

Infin, j'dis cha, vous faites comme vous voulez.

In tous les cas, si qu'vous pouvez trouver cheule arcette de ch'lapin au libouli, ch'étot pour ch't'au midi!