em n'ancienne maison dins l' rue d' Bône
par nounours-94 le, 15/03/2009Ech week en dernier ej sus allé animer el soirée des quarante d'em' cousine, à l'salle Damiens à Bruay. comme j'étos arrivé el vendredi assez tôt et que j'ai pu monter min matériel au soir, cha fait que j'ai eu tout min sam'di ed libre comme d'habitute ej sus allé flâner dins m'n'ancien quartier, ché t'a dire au trois.
Inévitablemint esse arquéyu dins l'rue d'Bône pour vire em' n'ancienne mason et, oh surprise al étot inhabitée. j'in ai profité pour raviser à travers chés carreaux, rintrer dins l'cour et faire un tour dins ch' gardin. que de souv'nirs d'infance qui sont armontés ale surface, malgrè qu'y a trente sept ans qu'ej l'ai quittée.
ben sûr tout est cangé, ale à été rénovée mais in ravisant bien i reste toudis quit'cosse; un p'tit rien qui vous rappelle tout par exempe: ech' pétit robinet qui étot et qui est toudis fixé au mur ed l'arrière cuisine, ech' tro à fien au bout du gardin, ech' carrelache d'el l'cour, l'inmplachemint de l' quéminée du fourniau à l'arrière cuisine, celle d'el salle à minger dusse qu'el cercueil d'em' grand-mère i étot intreposé quand à l'est morte.
Min seul regret ché d'en' pas avoir pu i rintrer mais avec c'que j'ai vu cha a suffit largemint à min bonheur. quoiqu' in m'arnallant mais yux i brayotent tout seu.
Insuite ej sus allé dire bonjour à Espérance eun' ancienne voisine, mi qui pinsot qu'al étot pus d'ech' monde grâce à un type que j'ai rincontré dins l rue. al est toudis là avec esse lanque toudis aussi bien pindue malgrè ses 84 ans
esse qui est drôle ché quand al ouvert el porte ale m'a arconnu tout d'suite malgrè mes caveux blancs. in à discuté pendant pus d'deux heures in arparlant ed ché anciens vijins vivants ou morts.
comme vous véyez cha été eun' matinée riche in souv'nirs et d'émotions.
( 1 photos)