Bonne fin d' journée
par Marie-Claire le, 23/04/2009Bonne fin d' journée de Jules Mousseron
Extrait de Feuillets Noircis 1913
Les mioches guettant près del cahute,
Joyeux ont crié : " V'là papa ! "
Et tout d' suite el binde s' culbute :
Ch'est à ch'ti qui l' preume arriv'ra.
I saut'nt, s' campronn'nt au bras d' leu père,
S' pind'nt à ses loques d' carbonnier
Et s'inv'loppent d'un taillus d' poussière,
Au grand contint'mint d' l'ouverrier.
Li, les suppli' d' rester tranquilles.
Pis, vite in rintrant à s' maison,
Avant d' démettr' ses agobilles
Fait à s' femme eun' baise au carbon…
L' pauve homm' n' peut point dire eun' parole,
Les infants parl'nt tertous d'un cop,
L'un li montre un bon point d' l'école ;
L' pus tiot, li, réclame el fricot.
Infin chacun a dit s' n'imblave.
L' mère a préparé l' caudron d'iau,
Et l' père, tout d' t'avot, li, s'arlave…
In s' met à tabe, et quand les mioches
Sont rassasiés tout leu contint,
Tout in rongeant l' restant des oches,
Y vont s'amuser au gardin.
L'homme a gagné d'arprinde haleine.
I va s'arposer un tiot peu,
In feumant l' toubac dins s' borraine,
Là, tranquill'mint au coin du feu.
El femme à s' ménage all' berdoulle,
Et, tout in r'lavant les bidons,
Raconte à s' n'homm' pus d'eun' bergnioule,
Disput's et rattaqu'ri's d' corons.
Mais l'aut' mat', de s' traval pénipe,
S'indort in s' moquant du caquet.
S' femm' n'a qué l' temps d' rascout' el pipe
Qui laissot kaire in f'sant s' niquet !