souv'nir d école

in éto arrivé in classe un tchiot peu énervés , car in savo qu ale allo arriver, ché parints i l avottent dit, d ailleurs chéto l' sujet d' conversation avant que l' portal d' l école i so ouvert et que ché zinfants i puissent rintrer d'dins l' cour d' l école Loubet

pour l instant "cha in print l' tournure " , comme dijotent ché mères, "mais cha pouvo cor canger, savez ché jamais bin précis " , "in tout cas que cha dure pas longtimps"

pour nous aussi chéto l' sujet d' conversation , mais autant ché parints i s' lamentotent déjà que nous in espéro que cha arriffe
cha y est coup d' sifflet dins l' cour, in devo aller s aligner d' vant l' grand porte d' not' batimint , in s ' metto in rang, par classe , bin aligné , et in attindo que not' mait' y finisse ed' raviser si vraimint y avo pas eune tete qu ale dépassotte , qu in so vraimint comme ché routes ed porions, dro et alignés comme dijo mr Pruvost instituteur ed l école Loubet

cha y est in rintro dins ch' batimint , classe aprés classe, sans trop faire ed bruit, sans courir, in rintro dins l' classe, in metto nos affaires à ché porte mintiaux in fond d ' classe , pi in allo s assoir à nous plache

à peine assis qu in raviso dehors, nan cor rin, ché vrai que ch' ciel i avo fait un mouv'mint , qui éto vraimint pale, qui faijo moins fro que ché jurs précédents, cha chéto ché mères qui in avo parlé avant d' nous lacher dins l' cour

pi in éto pris par l' cours, in acouto ch' maite qui commincho par eune lecon d' morale, i arsorto d eune boite, eune fiche, eune fiche par jour, et i commincho à écrire au tableau la morale, pi i commincho à lire eune histoire , qu in devo insuite commenter

eune fo cha fait, cha duro eune demie heure , in commincho les leçons proprement dites, vous dire quo que chéto comme cours ach' momint là j' m in souviens pu mais j' me souviens bien du que ché parti, ché parti d' min camarate Dieval qui éto such' coté, et qui s a l' vé pour raviser dehors quand que ch'maite i écrivo quéquosse au tableau et là, in a vu par ché farnietes qui yavo ché premiers flocons qui tombottent
ch' maite i s artourne i vo qu in est tout agité, i ravisse aussi par l' farniete et i fait ch'ti que cha émeut pas, i continue d' écrire au tableau tout in s' artournant d' plus in plus pasqu i sinto que cha s agito, chti qui avo l' role l' plus important chéto not' camarate Dieval, pasque i essayo d' raviser si cha teno par terre

bin sur y a un momint que ch' l instituteux i s a artourné et ch' Dieval i éto cor sul' pointe des pieds, i a archu such' tape un morciau d' craie invoyé par ch' maite , i s a assis tout d' suite mais i s a pris eune punition

in supposo quand meme que cha teno pasque l' neiche ale tombo drue, meme si ch' maite i avo prev'nu que d autes i zaurotent aussi eune punition , y avo quand meme queques "ho" "ha" pasqu in s'douto qu al' récréation in pourro faire des boules ed neiche
ce à quoi ch' mait' pour nous calmer i nous a dit que si in éto pas saches , bin in restero tous d' dins l' classe avec not' camarate Dieval et qu in li tiendro compagnie

cha nous a calmé, au bout d un momint , chéto l heure del récréation, cha nous a semblé long d y arriver mes gins ...

et cor , ch' maite i nous a fait l'lecon qui fallo pas courrir , pas lancer d' boules ed neiche, qu in 'n avo qui portotent des leunettes, qui fallo pas glicher pour pas s' casser eune gampe, que si cha dégénéro tout l' monte i restero souch'préau
in avo eu l' temps d' vire par ché grantes farnietes que cha t'no sec au sol, qu in voyo pu trace au sol des marques du terrain d' basquet , et que pour l instant comme aucune classe eto pas cor sorti, chéto immaculé et in avo qu eune envie, chéto d y courir

bon , j' do vous avouer que meme si ch' maite i nous avo dit d' ete sache, y a momint ché ché instituteux intre eux qui ont comminché à s' lancer aussi des boules ed neiche

dins ché eleffes t avo ché zintrépites, qui s amusotent à courrir pi à glicher insuite , t avo ché froussards, ceux qui avotent des leunettes et qui voulotent pont qu in les embetent, souvint i restotent in groupe souch' préau , t avo aussi ché agozils qui s amusottent à j'ter des boules ed neiche par dessus ch'mur, du coté del cour ed l école des files

in juo bin, et quand que l'sifflet i r'tentisso pour l' rintrée in cours, t avo toudis eune partie del' cour qui avo pas intindu que chéto fini

vite ch' maite i nous faijo met' in rang, et in armonto en classe que ch' maite i devo crier un bon coup , que chéto nin les vagances,que si cha continuo in auro des d'voirs supplémentaires

in rintro dins l' classe , in accrocho ché vet'mints au porte mantiau et in s asséyo
eune fos l' cours arpris, in avo les joues toutes cautes au bout d' chinq mineutes, chéto l' difference ed température inter l interieur et l extérieur

nos vet'mints suspendus à ché crochets tout comme nos godillots comminssotent douch'mint à gouter such' parquet in bo