du qui sont camuchés ?

ché eune question qu' in s'poso quand qu on éto tchiot al' mason au momint de la Noel
quand que j' dis "tchiot" ché quand meme qu in a passé eune étape fatidique , l' trosieme depuis la naissance, l' premiere in l a vécu in direque mais in n a pas d' souv'nirs ché not' naissance, l' second plus douloureux ché l' intrée à l école et l'trosieme, ché quand qu in cro pu au père noel

mi y a des coups j aim'ro cor y croire au père noel , nan pas pour arvenir in arriere, mais j avo ker quand meme l' mystère qui intouro s' venue, j avo quand meme du mau a acroire à li les derniers temps
faut dire que meme si in est tchiot in est pon bete ach' point là, j a vu que cha commincho a et' bizarre ché que meme si chéto l' pere noel qui apporto les cadeaux fallo armercier tout l' monte al' mason, du l' question bin ché qui qui l ammene ch' cadeau ché ti ou li, alors in nous dijo qu in fait , qu in pouvo nous dire pasqu in éto grand, qu in fait ch' père noel i amen'o ché cadeaux pour ti à t' soeur par exempe, pasqu ale li avo d'mindé et que t avo été sache durant l année
mi sache durant l année, j in sait rin, j ai plutot l' souv'nir sans zete un brigand , d'ete un "assassin" chéto l expression d' min père quand que j' casso quéquosse , et j in a cassé savez ..................

ch' t histoire ed père noel qui donno ché cadeaux à t' famile , bon chéto djà un tchiot peu du reve qui s in allo

pi l année aprés , in espérant qui n a pas un que sin grand frère ou sin mononque qui li auro dit intertemps que ch' père noel y existo pas, imaginons mes gins

bin y avo eune grante question que là ché parints i n étotent pon à leurs aisses pour réponte

ch' père noel i déchint bien par l' queminée , ouais qui dijotent ché parints bin qui voyottent du qu in allo arriver

mais ichi par du qui passe vu qui a pas d' queminée ?

j avo été fin such' coup là ,j' vous rassure sans l' vouloir et sans l' savoir , mais j avo posé chte question à m' mère qu in éto dins l' cuisine et apres j a été posé l'question à min père qui éto assis à sin bureau , cor in train d' faire des comptes , dans l' pieche ed devant ...

m' mère ale m avo répondu que ch' père noel i passo par l' fourneau , là j a ravisé ch' fourneau , pi aprés j a ravisé m'mère, j a eu du mau al' croire cha, pasque si i déchindo par ch' conduit i tombo directemint dins ch' fu et j' le voyo pas traverser cha , passer par ch' bac à chintes et arriver dins l' pieche sans qui so tout brulé et infinqué d' partout .....

cor si faijo cha pour eune mason, cha allo cor, mais i faijo cha dans toutes ché masons, nan ch' père noel chéto pas Spiderman ou j' sais pas qui , cha collo pas

alors j a été vire min père et là j' l a pris d' court , i a ravisé autour d' mi et i allo parlé d' queminée, que j y a dis qu in' n avo pon, et là plus fort que ch' fourneau, ch' père noel i arrivo par ché radiateurs

là j' m a dis in t' raconte des cacoules, que djà i traverse ch' fu, ché gaillettes, l' grille du fourneau , l' bac à chintes chéto djà mission impossipe pour mi , alors là j avo meme du mau à m imaginer ch' pere noel passer dins ché tuyaux qui faisotent moins d' 10 centimet' d' diamete ...

l' année d aprés j éto tout fier d' leur dire que ch' père noel i existo pas , que j avo tout compris , qui fallo pas m' el faire à mi

ET CHé LA que ça posé l' fameusse question "du qui sont camuchés ?" pasque ché cadeaux i zétotent acatés j l a compris aprés quand que j éto à l école, aprés i zétotent imballés al' mason calmemint pi camuchés jusqu au jour fatidique ......
j essayo d' savoir, j' dimindo, j essayo d' cacher, rin mes gins , rin , fallo savoir qui zétotent dinch' placard du salon, un placard incrinqué dins ch' mur, fabriqué à l époque par les zouillères, et au d'sus de chte placard, i avo d'chaque coté cor un rangm'int, mais pour y aller fallo d abord et' grand pi monter sur eune caielle pour les attraper, donc pendant eune paire d année cha a été pour mi un mystère ....