Message de Jean Dufossez

Bonjour à tous , bonne fête du 1er Mai, Nounours,i n'a pas qu'ti qui a un gentil Toutou

MESSAGE
Hier j'sus parti ouvrer et comm' d'habitud',
min crayon, mes papiers i étot'nt sus ch'bureau d'étud' .
Min quien i étot, fin bénach' dins sin tchiot panier .....
......Jinmais, j'naros busié qui s'arot utilisés .

Cha n'peut et' qu'li ,cha fait un momint qui m'raviss' ,
i m' surqu' in dirot un inspecteur ed polic' .
J'l'ai r'marqué, ia aucun problèm', cha fait belle lurett',
à un tel point, qu'in dirot l'inspecteur Gadjet .

Ech' crayon, i avot té machucré comm' un och .
Ah ! Qu'och qué j'vas i fair' comm' arproch's !.....
Jé n'vas pas l'taper ... Bin sur, i a trop longtimps qu'jé l'connos,
d'ailleurs, pou l'ingueuler, j'n'ai qu'à l'ver min tchiot dogt.

I s'crot tout permis, d'pus l'timps qui est avec nous ,
i arot not' cart' bleue, in s'rot dins les dett's jusqu'au cou.
Et pis, i nous fait la gueul', i fait du boudin,
i grogn', savez, jé l' laiss'ros fair'.... I mordrot m' main .

V'là chou qui est écrit sus ch'papier

Ah ! Mi, si j'peuvos dir tout ch'qué j'busie !
I a beaucop d'mond', croyez me, qui s'rot' nt bin saisit .
I n'd'a , in d'vrot leu dir' leu 4 vérités,
cha leu f'rot du bin, i l'aurot'nt bin mérité .

Ah ! Mi, si j'peuvos ein' seul' fos , fair' à m'mod',
du gernier à l'cav', i n'd'a qui déval'rot'nt.
In dit qu'tout' vérité, n'est pas bon' à dir',
i faut toudis fair' el part, du meilleu, comm' du pir'.

Ah ! Si j'avos l'occasion d' dir' tout ch'qué j'arsins ,
sins r'ténue, sins pudeur ni mintirie.
Pac'qué justémint, in sait qu'jé dirai rin ,
in préfèr' el dir' à sin quien , putot qu'à quéqu'un .


Ah ! Si j'inl'vos l'poids qu'j'ai sus min coeur,
un jour ed blouz, un jour ed'mélincolie.
Dir' à min tour, les méchin'c'tés qu'in m'a fait,
les dérinett's qu'j'ai eu pou un tchiot méfait.

Tiens !! I est d'jà ch't'heur' là, ah ouais, ch'est l'facteur qui pass',
faudrot p'têt' mi aussi ,qu'à min boulot j'fais fac'.
Faudrot qu'j'aboy au bin j'va m'artreuver, savez dû,
à l'nich', comm' tous les quiens, cha s'ra min dû.

...............................................................................................

Et là s'termin' el messach'....., Alors vous comperdez bin,
qu' jé né laiss' pus à l'cour quind i pleut, el coquin,
j'né l'raviss' mêm'pus dins l'blinc des yux,
i 'm' l'arprochrot, i' m'f' rot la gueul' là d'sus.

In l'inmên' avec nous, quind in sort .....Pou pas qui déprim'
et in n'crie pus d'sus, busiez un peu .....Cha s'rot un crim'.
Savez not' quien, i couq' ed'sus not' lit .......Comm' panier i a pas miux,
in l'bichonn' ....Pourtint ch'n'est pas un bichon , ch't'un chit-zu.

El nich', i a longtimps qu'in l'a mis à l'poubell', et ach't'heur,
I faut i parler avec doucheur .....Avec déférenc', sans heur ,
ch'est nous qu'in s'mettrot à g'noux, pou avoir ein' caress',
i n'faut point l' brusquer, faut arriver à ses fins avec finess' .

Ch'est un caractériél, cha l'iarrif' ed bouder dins sin coin .
Tous compt's faits, j'mé d'mind' si ch'est bin li, l'écrivain!!!
Monsieur, n'desserr' pus les dints, i fait l'andoull' ,
In ch'momint j'ai l'imagination fertil', j'cros qué j'perds la boul'.

J'espèr' qu'min tchiot poèm' vous a amusé ,
in ravisant min quien , j'busie qui veut m'parler.
I comprind tout , i n'y minqu' qué l'parol',
si i l'avot, mon mer' comm' cha s'rot drôl'.


D'pus l'timps qui sont à nos côtés ches animaux,
in n'd'a tiré profit, in l's'a accusés d'tous les maux.
Mieux qu'cha, à tout's les sauc's in l's'a consommés,
mêm' les quiens i 's i ont eut drot, sins pouvoir parler.


Jean Dufossez

Bonjour jean , ch'est eune poésie qui m'plait gramin d'autant plus que mi aussi j'a un shih tzu , ale a que 3 mos mais déjà bien du caractère mais i sont adorapes ...
là ale est couchée su ch'bureau d'vant min clavier ... ben ouais ch'est possipe passqu'ale est core pétite ... alors mi ale prindra ptete pas un crayon pour écrire mais ale écrira directemint su ch'clavier ...