Ducasse dins ches quartiers par Lucie Krawczyk
par Lucie Krawczyk le, 30/05/2010L'aut' jour, in allint sur Hénin-Beaumont, j'a pas pu stationner à l' médiathèque car y' avôt l' ducasse !
Et du cop, chà m'a r'fait pinser à chelles de m' ville : Libercourt.
Quind j'étôs pus jône, jé m' rappelle qué dins m' ville y' avôt au moins 4 ducasses par in dins plusieurs quartiers dé l' ville.
J'a connu chelle d' la cité dé l' Faisind'rie où j'habitôt y' a incor' pas longtimps !
Qué d' souv'nirs !
In Juillet, chés forains s'installôttent près d' l'école primaire où j'allôt et pindint eunne bonne semaine ch'étôt ducasse dins l' cité !
L' soir, in allant s' coucher, in intindôt l' musique (tous chés succés du momint) jusqu'à au moins 11 heures !
Dins l' même timps, y' avôt bal kermesse l' diminche et tous chés gins dé l' cité s' donnôttent l' mot pou' aller y faire un tour !
In ch' timps-là, in n' craignôttent pas d' sortir l' soir in famil', y' avôt pas d'agresion !
L' ducasse par elle-même n'étôt pas grinte : 1 manèche pour chés infants, 1 auto-timponnantes, 1 chénille, 1 balinçoire in forme d' batiot, 2 stinds d' tir (dont 1 avec des boules à tirer su' des boites d' conserf's vites), 1 marchind d' nougats et aut's sucrettes (ah, les barb's à papa d' min timps, tout pou' l' guiff'!) et eunne baraque à frites !
Jé l' souv'nir dé ch' manèche pou' chés gosses où y fallôt, à un certain momint, au cri dé ch' forain, attrapé ch' pompon !
Personnell'mint, jé n' l'ai jamais attrapé !
L' diminche, in famil', in allôt à l' ducasse et pindint eunne bonne partie d' l'après-midi, ch'étôt la fête pou' chés z'infants !
In avôt pas loin à aller, vu qu' ch' étôt à peu près à 100 mèt's dé m' mason, alors, ch'étôt à pied qu'in y allôt !
Au niveau dé ch' bal kermesse qui s' passôt dins l' cour dé m' école, y' avôt des orchest's amateurs frinco-polonais qui jouôttent des airs d' toutes sortes pou' faire dincher chés gins pindint qu' certains étôttent attablés à l' buvette !
Pis, avint d' rintrer à l' mason, in avôt l' drôt à assister à l' lot'rie dé ch' stind à boîtes à conserf's pou' qu'un minbre d' l' famil' essaie d' gagner un lot, mais l' chince n'étôt pas au rindez-vous, tint pis !
Alors, in s' rattrapôt su' ch' nougat et l' barb' à papa !
Comme j'a dit plus haut, y' avôt aussi l' ducasse dé l' Foche 5, chelle du cint'-ville (place du marché) et chelle aussi juste à côté d' l'égliss' Notre-Dame in même timps qué l' brad'rie !
Ch'étôt l' bon timps des amus'ries d' not' jône timps !
'Jourd'hui, à Libercourt, y' a pus eunne ducasse !
Faut dire qu' les timps ont chingés, les gins n' sont pus intéressés par des plaisirs simp's, mais bon, autre époque, autres moeurs, autres goûts !
L' principal, ch'est d' garder les bons souv'nirs de ch' timps passé !
Oui,pour LUCIE. Mais l'grande ducasse ch'étot chelle du 5. Elle comminchot à mo DORCHIES, c'l'épicerie polonaise du vert chemin (à coté de chelle dé mon Gustav, l'père des pompes funèbres Laurent et Sion du centre ville) et elle finichot à mo ch'café ALBIN. Elle prenot tout ch' boulevard Faidherbe, devant l'entrée du chinq. Pas de tamponneuses à l'époque mais beaucoup de loteries et manèges d'tiots
J'y suis né au chinq. pour aller à l'ducasse l'diminche comme in étot enfants de choeur, après l'messe ch'curé (L'abbé BRICHE) y nous donnot quelques sous de l'quête. Mais nous otes avant de rindre ch'panier d'obole , in se servot!!! et ché sin regret ni honte qu'in claquot ché cinq centimes en alu à chez chevaux de bos et ché balançoires . Mais qu'chéto le bon temps , non de diou!!!!!