les mains d' manman
par minloute le, 10/06/2010j' me souvins mes gins del' préparation del buée l' diminche soir , ch' lessiveusse ram' née del buand'rie , min père et m' mère d' chaque coté in t'nant l' poignée
diminche soir préparation del lessiveusse pour l' buée, cha sonno aussi l' fin du week end, allez minloute au lit d'main y a école , que phrasse qu in a tous intindu ....
mais mi j' pinse surtout aux mains d' ma manman aprés eune journée d' buée , des mains qui avotent trempé un bon momint del journée dins l io, avec des lessiffes plus proches du détergent que del lessiffe à vraimint parler ...
j' vo ché crevasses qu ale avo, ale metto douch' mint del crème , sans trop rin dire, m' mère as plaigno pas, mais in voyo qu ale souffro
ah ché crevasses, pi les gerçures, j' cro bin que ché par là que m' mère ale a veilli in premier , ché mains ...
alors ché vrai , in est souvint in train d' dire ou d' laisser pinser que du temps d avant chéto miu, à vire les mains dem' mère , escusez me, mais du brin ....