che fêtes ed famille (1)

Mi, chu qu'j'ai arténu ch'est l'saprée ambiance du deuner ! I'arrivot un momint dus qué l'companie alle criot ,in buquant s'forquette su sin plat , "Marcel eine canchon ! Marcel eine canchon !"
Adés, Mononque Marcel i s'lévot et i nous cantot eine canchon qu'in n'connossot pon ! ch'tot ein iair d'opéra !
Tertouss ébahis , in aouïssot sortir dé s'gasiau eine vox magnifique , eine vox d'basse qui nous fasot fersonner!
Bin sur, in buquot gramint dins nos mains à l'fin du cant !
Pis in criot insanne : "Eine aut'! Eine aut' ! "
Mais Mononque Marcel arfusot:
"Fot laisser m'vox s'arposer un momint"
Adès , in s'tornot vers matatante Monique et ch'tot l'menme arfrain :
"Monique eine canchon ! Monique eine canchon !"
Monique , f'sot l'timide et s'torténot su cayelle , in f'sant simblant d'arfuser mais à l'fin alle sé l'vot pou canter.
Là ch'tot tout l'contraire ed Marcel. Alle cantot eine canchon populaire plein d'intrain et nous in arprénot in choeur el arfrain!
Et parel, in buquot à l'fin dins nos mains sauf qu'alle étot d'accord pou in canter eine aut'! Ouais mais ch'cop chi l'iair i'étot bin pu dur et à in momint donné , es' vox fatiguée n'a pu suire et un affreux canard i'est déhutté d'sin gasiau !
Adès , d'eine felté, d'un menme mov'mint, tous les hommes i sont arderchés en aveuc leu bras i z'ont fait mine ed saquer au fusil in criant tertouss :
" Pan ! Pan ! Pan !"
Mamatante Monique, vexée, alle brayot et les feimmes alles l'ont bin achochoné pou l'consoler in merronant gralint cont' les hommes sins coeur!
Et pis après , i'avot coeusin Louis , el conteu, qui nous disot des poêmes comiques ed Jules Mousseron pis plein
d' histoéres ed Cafougnette si dreules qu'in pissiot dins s'marrone !
Achteure , in cante bocop moinsse ; i fot un kakakoké (j'veux pon arténir el nom). Et in met l'télé pou vir el grand Prix d'Formule 1 ocore un aut' évèn'mint sportif et in reste tertous comme des babaches à raviser les images. Et mi , véyant cha , j'déhutte à l'cour printe l'iair.