L'infant et l'joqueux à l'ducasse
par TIOT RITAL le, 14/07/2010L’infant et l’joqueux à l’ducasse
L’manèchge des tiots z’infants tornot,
ses derniers tours. L’ducasse s’terminot !
Dpu longtemps un aploute bin treup sache,
ravisot tourniquer les jonnes dé s’n’âche .
Comme i serrot fort l’potiau d’ses bras brousés !
A vir l’état d’ses sorlers ratass’lés,
ses loques abongées, s’figure bribousée,
seur, à s’mason in d’vot pon rigoler !
Bastien, l’affligé, qui joquot in ç’momint,
n’vot pon l’ameur muchée du gamin :
« Ebin, té n’d’as pon cor assez, m’gueux ?
El manège freume, à t’mason, fot daller, fieux ! «
L’tiot, l’argard au lon, pierdu dins ses idées,
soumaque douch’mint : « Ej sus jamais monté ! »
Bastien comprind alors’ el trisse vérité,
oblie s’prope misére et d’un cop s’a décidé :
D’ses poques, l’monnaie d’sin pain i met à jour
I n’n’d’avot assez pou faire un tour !
I donne les doupes à l’infant ébahi,
qui vot réaliser sin pu ker dési !
L’bout d’culs délaisse les tanks à canons,
les rouches carettes, l’bleu avion, l’bédon !
Sins barguégner, i sé hauche su l’quévau,
Et s’arderche, fier, d’êt’ su sin dos !
Au mitan de l’ducasse désertée,
invahie par eine quasi noirté
el joie muette dé l’fraternité
éclairot l’infant dins s’félicité
Tiot Rital
Pou miu comprinte :
Abongées : mal habillées
affligé : infirme
ameur : émoi
aploute : enfant fragile
barguégner : hésiter
bédon : cochon de lait
bénache : heureux
brousés : salis
bribousés : sales
bout d’culs : petit enfant
fieux : fils + terme d’affection
gueux : gueux mais terme d’affection
(s’) hauche : se hausse
joqueux : chômeur
joquot : chômait
loques : vêtements
ratass’lés : ressemelés
soumaque : sangloter en parlant
tourniquer : tourner
ta bin fait d'rajouter des esplications , passe qu'ya des mots , qu'ej connaichos pas , mais in da certains qui'm'sempe avoir d'ja intindu , quand j'restos à marly les valenciennes