el Tour ed France

J'vodros dire 2 tiotes paroles su l' Tour ed France cyclisse. In peut dire chu qu'in veut, l'Tour i rassane bin pusse ed gins qu'les aut' sports !In pusse ,el spectacle i'est gratuit ! Dins l'z'étapes ed montane , i'a telmint d'monne qu'les coureux ont bin du mau à passer ! Des gins ont eine saprée touquette (sont fous) à coeurrir à coté d'eusses in allotant loques obin drapiau!
J'ai ravisé passer l'Tour à Sars Rosières (Nord, à côté d'Orchies), dins un passache plein d'pavés biqueux (étape Wanse-Arinberg). I'avot pusse ed flaminds qué d'frinçais! I'a des gins qui v'note ed Normindie ocore Bertagne aveuc leus campings cars ! Des cops i sont sins gêne pasqu'i s'mette à l'intérieur d'eine pièche (champ) ed blé! D'jà, l'organisation busie à arvénir dins not' région . Cha nous f'ra eine miette ed pub . Fot savoir qu'les gindarmes i freument l'accès des quémins visins à l'course alintour ed 3 heures avant sin passache. Eine heure et d'mie avant, in vot passer el caravane publicitaire qui rue aux gins des chucartes, des casquettes et aut' biribis ! Pis après passe pusieurs cortèches d'gindarmes in moto. D'un cop , dins l'ciel, au lon, in vot et in aouï des hélicotères! Eine milette au cop i s'rapprochte ! I n'd'avot 6 ! I' n'd'a un qui s'est plaché bin bas à 50 mètes drière nous et l'soir in s'a vu à l'télé. Mais v'là qu'arrive eine carette , aveuc des leumières bleusses, marquée "course" ! In crie : Les z'eux vlà ! In l'zé vot la-vau au lon !"
Eine dizaine d'écappés passte d'eine felté! Drière, el ploton avot explosé in chint morciaux ! Pis un bon quart d'heure pu tard, d'z'attargés arivte aveuc des marronnes déquirées et pans'mints aux gampes ou bras. Infin arrive el camionnette fin d'course. Ch'est fini ,bénaches, in artorne à s'mason !
Aujord'hui, diminche, Stade 2 a fait un arportache su l'Tour . D'un cop, l' présinteu cope l'arportache et moute ...advinez ? du fotbal ! Et queul fotbal ! !quèques imaches ed pauffes matchs ed préparation d'tros cleubs : Marselle, Lyon, Paris ! Pire, i inquaine pou moutrer gramint d'imaches d'Thierry Henry (et d'sin nué cleub), un des 23 clowns qui ont fait rire à nos dépins el monne intier in montant dins un bus putôt qué s'intraîner ! Porquo li faire tant d'honneu ?
In avot eu un Tour ed France animé, aveuc des coureux frinçais corageux (6 victoires d'étape !), in povot dire plein d'affaires, pon foque su les méïeux, mais aussi su ceusses qui avote galéré, dire d'z'anecdotes, parler aveux les mécaniciens et les caméramen, parler du tiot gagnache in doupes ed quéques équipes (eine a récolté moinse ed 10 000€ pou 9 coureux !) et cor bin d'z'aut' z'affaires .Ebin non ,i'a fallu coper l'arportache pou parler fotbal !

Bon ,aut' cosse, vous allez dire qu'les coureux i sont dopés. Ouais , mais eusses i sont controlés pu sovint. Mais in tennis , in fotbal, les sportifs i n'sont pon dopés ? Et combin d'controles ? In l'z'annonch'te aveuc eine trompette ! "Controle sam'di prochain" ! J'vodros ramintuver l'période dus qué Cantona i'étot jueux à Marselle : toudis i'a arfusé d'archévoir el piqure du mardi ! Au fait ch'tot eine piqure ed quo ? ed tisène ? Aut' affaire, commint espliquer el grosseu sodaine des cantiaux (cuisses)ed quéques jueus d'fotbal?
I ming'te des frites ou putôt dé l'créatine ocore aut'cosse ed pu mistérieux?
El gazette dit qu'ch'est un homme ed not' région qui i'est nommé Persidint provisoire du fotbal. Bonne affaire ! Ch'est quéquin ed sérieux ! L'nué intraineu aussi !
Mais cha in verra pu tard! Aujourd'hui ch'tot l'fiète du vélo et à vrai dire in s'a régalé à ravisé ed biaux paysaches , catiaus , églisses , monumints décrits pa l'excellint Jean Paul Ollivier. Pis in s'a aussi régalé à vir des coureus qui a peine déquindus d'leu vélo, cor tout éhansés (essoufflés) mais soriants, i accep'te aveuc plaisi ed parler aux jornalisses! Un biau ecsimpe pou les Bleus !
Eusses,quaind in jue el Marseillaisse i sont drots comme des estatues obin maqu'te du cheving gomme ! L'espagnol Contador, quaind in a jué l'hymne espagnol, i'a plaché s'main su sin coeur et in véyot ses lèves bouger .
Ch'est cor un biau ecsimpe pou les Bleus !
J'arrête pasqu'i n'd'arot cor bocop à donner !