l' biere d' saint omer

j in a djà parlé que j adoro ch'te biere, l' preuffe ché que l' dernier coup in n avo pu in rayon à mon carrefour marquette , bin j a poussé un grand "meeeeerrrte" dinch' magasin, meme que ché gins dins l' rayon liquite i s' sont d'mindés quo ché qui arrivo ...

l' biere d' saint omer et l' stella artois ché mes bieres préférées
j' vo cor la s'maine derniere , j offe à mes voisins eune leffe in tchiote boutele (ouais faut leur apprinte aussi à boire des bonnes chosses) et mi quo qu' j a bu, bin j a sorti min lit' d' biere qui éto au frigo, boutele plastique , m' biere d' st omer
d' abord i zont cru que j avo pu d' leffe que j' me sacrifio, nan que j' leur a dit mi j' préfére cha, vous connaissotent te pas, zallez pas avoir ker, pour vous ché del bibine ......
i m ont pas cru et zont voulu couter l' biere d' saint omer, et i zont été surpris, d abord i dizotent rin d' plus, pi j a insisté et zont dit que cha avo pas d'gout et que chéto del pichatte, pasqu ale avo pas "d' caractère"

là min sang i a bouillu, pas "d' caractère" m' biere ? alors j a arpris min bouclier , m' n épée et j' su arparti à l assaut des préjugés ...

qui zaient pas ker l' biere d' st omer, j' peux l' comprinte, mais i zont été intoxquités par l' publicité del biere grimbergen , la "biere de caractère" , faut dire qu ale a bénéficié d'un paquet d' publicité pour la lancer ch' te biere ...faut dire que cha fait partie du groupe hollandais heineken
et pour mi des sociétés qui monopolisent eune partie du marché, bin cha fait disparaite plein d' tchiotes marques , donc des gouts différents
j' mets pas d' majuscule à heineken, d abord pasque j a pas ker ch'te biere, mais surtout qui zont invahi ch' marché , monopolisé eune bonne partie du marché, entre heineken, kronenbourg et grimbergen, ché l' meme groupe asteure
et pour mi escusez me du peu, la grimbergen, ché eune leffe qu ale est pas finite .........
vous m auriez dit i fabrique l' biere qu ale s appelle "trappiste" , là j auro été obligé d' met' un g'nou à terre , pasque chele lale ché du sérieux en concurrent à la leffe

mais la grimbergen, laissez me rire..ché pour cha que j' leur ai fait gouter la leffe quand qui sont v'nus

mais pour in arvenir al' biere d' caractére in général, j' trouffe inch' momint qu in fait n importe quo avec la biere
in in fait un alcool à pas cher, savez ché boites métalliques d' 50 cl ...50cl soit l' valeur d' 2 d'mis cha d'vient asteure la dose minimale .................

pi surtout c'que j a pas ker ché qu on est en train d' diaboliser tout cha, ché la course dans ché brasseries à fabriquer des bieres à 8 degrés minimum , cha d'vient tel' mint un argument d'vente qui a des bieres que leur nom ché simplement leur degré d alcool ...........

in fait d' la biere très alcoolisée dans quel but autre que d' toucher tous ché jones qui vont sortir in boite, et qui s'in prenne eune au minimum avant d faire leu virées

j a l impression que la jeanlain, ché presque considéré comme pas assez fort pour s' in printe eune rapid'mint

aprés y al' coté "snobinard" , in bo del kriek pasque i a del cerise d'dins ( j' dis pas que ché pas eune bonne biere , loin de là ) in rajoute aussi del téquila dans la despérado (ché pas mauvais aussi d' temps en temps j' l avoue ) , mais in comminche à faire n importe quoi

alors mi , dro dins mes bottes, j' defends la biere d' st omer
degré d alcool , escusez me que 4 degrés
ché eune biere de table , voyez eune biere qu in peut boire normal'mint, (j'dis pas qui faut pas faire attention quand meme )

mais pour mi cha m' rappelle ché bieres d' tabe qu in buvo quand qu on éto tchiot al' mason

et l' fin du fin pour mi ché quand t arriffe in bas del' boutele, ché comme dans 'l temps , y a pu grinmint d' bulles
j' dis pas que ché fameux, mais pour mi ché vraimint l' gout dem' n enfance

j' sais pas commint qu ale est leur situation financiere à chte société là, y a un momint i zavotent été racatés par heineken et j a vu d' zartiques d' journal que ch' l ancien propriétaire d' la brasserie y s éto séparé du groupe heineken
alors j' vous invite pas à la débauche, à boire jusqu à plus soif in acatant d' la biere d' st omer
mais au moins goutez y un coup, ptete aussi que vous direz "bin ché nin fameux" , pour d autes cha rappelera les bieres d' not' infance ,ché cha qui est bien ché qu on peut avoir des gouts différents ...

j'su cor obligé de donner raison minloute , j'ai cor eu l'tour quand min breton ed' garchon ya v'nu l'semaine passée , ya querre in bonne bière , min bieau ché du visqui , et mi j'ai voulu gouter a in bière blanque , j'n'avos jamais vu , bin al est pas mauvaisse , mais j'préfère in st omer ou in kro , comme pour ech' pinard yavot in bonne boutel d'su l'tape , bin mi j'bos min pinard qu'j'ai tiré d' min cubi , ed' 5 lites , j'sais pas apprecier , alors j'bos m'n'ordinnaire
ta dis d'in tin commentaire qu'té mettos pas d'majuscules , cha m'rappelle quête cosse , ti nan ?