hivers enneigés
par Marie-Claire le, 08/09/2005Os allez dire i sont un peu bizarres ichi, pourquoi i nous parlent d' l'hiver inch momint ?
Ben passeque chés idées s'enchainent souvint et que minloute vient d' faire un sujet sur Noel et que l'photo al m'a rapp'lé qu'dins l'Nord y avot des hivers plus inneigés qu'achteure j'cros bien, à moins qu'cha soit eune idée qu' j'em fait.
J'em m'souviens qu' quand j'habitos Enquin les mines, in prenot l'car scolaire pour aller au collège à Thérouanne à 7 kms et contrairemint aux idées reçues, ché pas un pays si plat qu'cha l'Pas d'Calais ...
Alors quand y avot del neiche l'matin, in allot quand même à l'arrêt d'car et in attindot un peu mais y a des jours in s'doutot bien que ch'car i passerot pas passqu'i pouvot pas monter chés côtes du coin.
Et in in prenot pour deux jours d'vacances in général, deux jours d'vacances pas prévues, dins l'neiche, chétot génial.
L'pire chétot quand cha arrivot dins l'journée et que l'matin y avot rien. Ché arrivé un coup, j'sais pas qui connot Thérouanne mais y a eune côte à l'sortie du villache dins l'direction d'Enquin et là un jour y avot comminché à neiger dins l'matinée sans s'arrêter, au soir ch'car y a pas pus finir d'monter l'côte, in a fait ch'trajet à pied, dins l'nuit et dins eune bonne couche d'neiche jusqu'au villache suivant à 4 kms, i n'a qui sont restés chez l'habitant et d'autes qui sont rintrés autremint à leu mason, mi j'sus rintrée dins eune dépanneuse du garache d'Enquin avec d'autes infants d'Enquin, cha devot ete in 1970.
Ché pas du tout des mauvais souv'nirs, achteure cha n'arriverot pus, dès qui a 1 cm d'neiche ché cars scolaires i z'ont pus l'drot d'rouler