l' leçon d' morale

cha commincho toudis par cha au matin, in rintro dins l' classe, in s asseyo, sans faire trop d' bruit sinan ch' maite i nous rap'lo à l'orde ...
Eune fo assis , fallo croiser ses bras, et pas taper avec ses pieds sul' barre in bas dech' pupitre
In déballo pas not' sac, i fallo simplemint bin l' met ' en appui such' banc, pasque ch' maite i allo commincher par la leçon de morale
Chéto tout un rituel, comme si in allo archevoir la parole divine, chéto comme un peu un catéchisme laique ..... In r'cevo les commind'mints ......
Ch' maite i sorto eune espéce de boite in carton et là i preno eune fiche, eune fiche par jour
Chéto pas pris au hasard , pasque ach' tableau, sous la date du jour, éto djà marqué la formule moralisatrice d' la journée .....
Formule moralisatrice aprisse par ch' maite
I nous liso eune tchiote histoire d' la vie quotidienne, ou d' la vie d' certaines personnes, et fallo réagir aprés , et j' vous diro que rin qu in ravisant l' formule inscrite au tableau , in savo dans quelle direction in devo aborder ch' sujet .........

y a des coups y avo illustré sin propos par eune affiche qui devo servir pour les cours d histoires, j' me souviens d eune imache arprenant un tableau du 18 ème sièque du qu in voyo l intérieur d' eune mason d paysans, avec ché zécuelles vites posées sul'tape, ch' fu éteint dans l' cheminée, et l' paysanne qu ale avo sur sin dos des loques d' misère tout in portant in éfant tout chétif .......

tout cha pour nous dire qui faut pas boire que cha peut foute ch' ménache en l air ...... aprés yavo d' zhistoires d' mint'ries , que ch' minteux à la fin i éto découvert et qui li arrivo toutes les misères du monte (mintez pas mes gins ravisez c' qui va vous querre ed'sus) , des histoires aussi d' jalousie maltapropos, ou cor pire d' paresse et la saleté
in nous arservo l histoire d' clovis qui avo coupé l' tiete à un d'ses soldats qui voulo li printe ch' vase d' soissons, mais que clovis y a vu que s' n épée ale éto pas entre'tnue, alors i li coupe l' tiete ........

yavo aussi l histoire de Merlin Merlot, chéto un fabliau du moyen ache, yavo aussi des extraits d' liffes d'victor hugo , bref in avo dro chaque jour à cha , à acouter l histoire , à essayer d' trouver l' solution (fallo l'ver sin bras et ch' maite alors i désigno chti qui voulo pour donner l' réponse).... pi aprés ch' maite i arveno al' phrase qui éto au tableau , qu in devo répéter eune paire d' coups tous insempe, ché c' qu on appel'ro asteure d' l endoctrin'mint ou d' la marteauthérapie .......

bin sur asteure ché pu enseigné, vous dire qui faudro armette cha au programme, peut et' , in tout cas in metto plus en avant les valeurs morales qu'asteure .......

J'a connu cha aussi et j'pinse que ch'étot pas nuisipe du tout ... in avot des notions d'morale, même si sur el coup in n'y prétot pas plus ed cas qu'à un aute leçon, mais cha nous restot marqué quand même. Et in avot l'notion qui a des chosses qui s'font pas. Et si in plus in allot au cathéchisme, là in in reprenot eune bonne dose
Ptete que cha manque un peu

mi aussi j'avo ker cha. nous chéto l' lundi matin quand j'éto in ce2. quand on arrivo in classe, el sujet i éto écrit such' tableau. comme on avo un maite assez ouvert on pouvo discuter avec li sur l'thème abordé. ej cro que chéto l' jur que j'avo ker à aller à l'école. malheureusemint cha n'existe pus ché dommache parce que i auro peut ete moins d' violence et pus d' civilité dins l' monte d'asteur.