ch' jus d' bouillon
par minloute le, 30/09/2010j' va pas vous décrire l' cuisson du bouillon et l' plaiji d in minger à midi, ché djà fait dans d' autes zartiques ........ j' a djà parlé aussi des legueumes qu in armingeot l' soir .......
mi j' va vous parler du bouillon, ah pas du bouillon qu in bo l' premier coup , ch' bouillon clair, avec ché zeules d' dins , nan , pas chti qu on arboit au soir, mais chti qu' té bo l' lend'main ...
i reste pu beaucoup d' bouillon dins ch' faitout, i a cangé d' couleur par rapport à hier, y est un peu plus sombe, i n in peut pu ... i cauffé tout douch'mint durant tro , quat' heures la veille au matin, aprés i s a arfroidi, pi in l a armis such' fu et là in l a fait armonter en température plus vite, pi y a eu toute l' nuit pour s arposer ..
là au matin, ch' bouillon i est mat, i reste dins ch' fond du faitout avec un morciau d' feule d laurier , un bout d' cel'ri et d' carotte.............
et là , in l arfait cauffer , et aprés in l' verse d' dins zin bol i nous ravisse avec ses zeules tout pitits , mates d' ete cauffés , arcauffés, i nous dit " j espère que ché l' dernier coup qu in m'met such' fu"
là in print ch' sel et ch' poive et in verse d' dins plus qu à raison ... et aprés ché un régal, in sint dins l' bouque qui éto temps del boire ; c' soir i auro été suret
in sint les derniers morciaux d' légueumes , imprégnés par ch' bouillon, qui s' laissent minger sans aucune resistance ................
in a vraimint l impression d' boire quéquosse ed très différent de c' qu' in a connu la veille
t' façon , quand qu in a mijoté, ché cor meilleux aprés récauffé
rin qu'de lire j'em pourlèque , avec chés neuls qui nous ravistent , justemint em femme al d'a fait un samedi ed' bouillon , et deux jours avant chetot un rassacache , cha sint l'hiver mes gins
( 1 photos)