cor chinq mineutes pi au lit toudis
par minloute le, 03/11/2010aprés l' fromache, in avo dro ou presque l ordre d'aller juer dehors, ché femmes i débarassottent ché assietttes et ché couverts, in laisso simplemint ché verres et quequ' bouteles que ché zhommes i s arservotent pendant qu' ché femmes ale discutotent insempe dins l' cuisine à faire l' vaisselle
chéto aussi un momint à elles, à discuter , à s artrouver insempe et ché zhommes quand à eux, soit i restotent comme j a dis à finir ché bouteles, soit i zallotent finquer eune cigarette au bord du gardin , quite à juer à faire eune partie d' ballons avec ché zinfants ...
bon i s' faijotent chambrer quand qui passotent par l' cuisine, in leur tindo un torchon pour donner un coup d' main, mais i trouvottent toudis eune raison pour pas l' printe et s'sauver sans faire la vaisselle, souvint sous la huée d'toutes ché garnoules
eune fos l' grosse vaisselle terminée, l' maitresse d' mason ale prenno ché tchiotes assiettes qu ale avo djà mis à l avinche sur l' plaque dech' buffet, bin ouais, pasque eune fo tout l' monte assis , pas pratique d aller arquerre ché bio couverts au fond du buffet, pi fallo passer un coup d' sus avant d' les mette sul' tappe vu qu in s in servo pas tous les jours , parel pour ché tchiotes cuillères del ménagère, mis d' coté, et frottées à l avinche
arrivo l' momint qu in attindo tous et plus particulier'mint ché zinfants, chéto l' momint des tartes ...... soit qu ale zavottent toutes été faites al' mason, soit y avo toudis eune matante ou eune cousine qu ale v'no avec 2 ou 3 tartes , pasque dins l 'famile chéto l' espécialiste del tarte au chuque ou au libouli ....
là fallo pas nous prier, fallo qu in nous crie un coup, "ché l' dessert" qu in dévalo dins l' pieche comme eune volée d moniaux et que souvint in éto arpoussés dins l' cuisine pour s' laver les mains, bin ouais té va pas minger chal' tarte avec des mains comme cha ...
in ramn'o sul' tape ché tasses d' café, in sorto tous ché digestifs, l' boite à chuque , et ché grantes personnes ale zartournottent à tape ....
chéto un momint du moins au début un peu plus calme , faut dire que ché stomaques i zétotent à rutes épreuffes depuis l' midi , entre ché plats , ché zapéritifs, ché vins , sans oublier l' biere pour certains .... in s' rapuro , pi au fil del conversation, l' ton y armonto, certains poussottent l' canchon sans trop s' faire prier, d' autes s' réunissottent au coin d eune tape, ou dans eune pieche à coté pour juer al' manille insempe , "bat atout" "j avo min roi s'gond" "faut toudis arlancer à l atout" , ché bien c' qu in intindo chaque année ...........
chéto aussi l' momint pour ché personnes agées d' discuter intre elles, cha discuto sec "d artrosse" , "d' tinsion", "d'escarres" , "d' bandaches", du docteur untel, d'un examen à Bois Bernard, ,d un endro qui s appelo "elfaut"
Aprés ale parlotent d' leu maris décédés, du temps du qu ale zétotent elles meme ché maitresses d' mason , et quequ' fo hélas d' leu zinfants disparus prématurément ......
pi yavo eune tchiote file qui passo pas loin , alors ale se l accaparotte pour l' faire parler , pour l'printe dins leu bras, comme si ale zardevenotent pour quequ' zinstants , les manmans qu ale zavotent étés....